ЦХИНВАЛ, 5 ноя - Sputnik. Хуссар Ирыстоны Мидхъуыддӕгты министрады (МХМ) кусджытӕ бакодтой уголовон хъуыддаг Цхинвалы 39-аздзыд цӕрӕджы ныхмӕ зайӕгойтӕ ӕнӕзаконон зайын кӕныны тыххӕй, кӕцыты ис наркотикон буарад. Уый тыххӕй Sputnik фехъусын кодтой республикӕйы МХМ пресс-службӕйы.
"Оперативон кусджытӕ нӕлгоймаджы цӕхӕрадоны ссардтой гӕны 12 къутӕры. Хус гӕны массӕ рацыд 30,18 граммы", - банысан кодтой уагдоны.
Уымӕй дарддӕр, ивгъуыд къуыри ӕрцыд ӕртӕ фыдракӕнды, кӕцытӕй дыууӕ сбӕрӕг кодтой. Ӕхсӕнадон фӕтк фехалыны тыххӕй Цхинвалы мидхъуыддӕгты хайады кусджытӕ ӕрцахстой 13 адӕймаджы.
Республикӕйы фӕндӕгтыл ӕрцыд 4 фӕндагон-транспортон цауы, кӕцыты фӕстиуӕгӕн зиан баййӕфтой 4 адӕймаджы. Афтӕ ма Паддзахадон автоинспекцийы кусджытӕ сбӕрӕг кодтой фӕндагон змӕлды 255 фӕткхалды. Дыууы шофыры фӕдыл сарӕзтой административон протоколтӕ хӕдтулгӕ нозтджынӕй скъӕрыны тыххӕй.
