ЦХИНВАЛ, 27 ноя - Sputnik, Плиты Фатимæ. Зæрæмæджы таможнæйы сæртыл Хуссар Ирыстонмæ дыккаг суткæ нæ уадзынц уæзласæн транспорт. Газелы шофыр Руслан Захаровы ныхæстæм гæсгæ, таможнæйы лæууынц къуырисæры изæры фондз сахатæй фæстæмæ, уæдæй нырмæ хæдтулгæты нымæц рæзы, кæцыдæртæ æнхъæлмæ кæсынæй бафæллайгæйæ здæхынц фæстæмæ.
"Мах къуырисæры изæры фондз сахатæй фæстæмæ нæ уадзынц. Микроавтобустыл стæм, ласæм, дарæс чи уæй кæны, уыдон товар. Цавæрдæр документ нæ домынц. Мах ласæм, базары цы товар æлхæд цæуы, уый æмæ уыдонæн та гæххæттытæ нæй", - загъта Руслан Захаров.
Шофыры ныхæстæм гæсгæ, таможнæйы æрæмбырд ис 20 машинæйы онг.
"Фыццаг суткæ урæдтой æрмæст дарæс чи ласта, уыдоны, ныр нæм æрбамбал сты хæлцад ласджытæ дæр. Дыууæ лæппу бацыдысты мидæмæ, уыдонæн бамбарын кодтой, таможнæйы кæй ис сгæрст", - бафтыдта шофыр.
УФ федералон таможнæйон службæйы минæвар Хуссар Иры Олег Ревайы ныхæстæм гæсгæ, сæвзæргæ проблемæтæ баст сты документты цухдзинадимæ.
"Ласт цæуы товар арæны сæртыл. Æххæст цæуы таможнæйон экспорты процедурæ. Ласгæ уæзæн хъæуы бадæттын экспортон деклараци, кæд сæм ахæм документтæ нæ разына, уæд таможнæйы органтæн сæ бон нæу æмæ ацы уæз рауадзой арæны сæртыл", - загъта Олег Рева.
Хуссар Иры таможнæйы службæйы та Sputnik загътой, проблемæимæ зонгæ кæй сты.
