ЦХИНВАЛ, 19 фев – Sputnik, Плиты Фатимæ. Хуссар Ирыстоны нывгæнджыты цæдис хоны æрмадзтæм гом дуæртты бонмæ. Республикæйы зындгонд нывгæнджыты сфæлдыстадимæ базонгæ кæныны фадат бакодтой Фыдыбæстæ хъахъхъæнæджы бонмæ, фехъусын кодта Sputnik цæдисы хистæр Битеты Алан.
Мадзал ацæудзæн хуыцаубоны, Цхинвалы Нывгæнджыты æрмадзты.
"Фыццаг хатт аразæм гом дуæртты акци нæ æрмадзты. Хуыцаубоны, 23 февралы æмбисбон суазæг кæндзыстæм кæйдæриддæр бафæнда, уыдоны. Мадзалы фæлгæтты фадат уыдзæн базонгæ уæвын адæмон нывгæнæг Цхуырбаты Тамерлан, сгуыхт нывгæнджытæ Бигъуылаты Рудольф, Харебаты Ацæмæз æмæ æндæрты сфæлдыстадимæ", - загъта Битеты Алан.
Хуссар Ирыстоны нывгæнджыты æрмадзтæ уæвынад кæнынц 13 коммунары уынджы 25 хæдзары. Бæстыхайы ис æдæппæтæй 18 æрмадзы, иуты дзы кусынц хицæн нывгæнджытæ, кæцыдæрты та нывгæнджыты династитæ æмæ бинонтæ.
