ЦХИНВАЛ, 19 фев - Sputnik. Хуссар Ирыстоны Хъахъхъӕнынады министрады ӕфсӕддонты тактикон ахуыртӕ хӕстон ӕхстимӕ ацӕудзысты 20 февралы уагдоны полигоныл, хъусын кӕны министрады пресс-секретарь Чехойты Инга.
Знон ӕфсӕддон полигоны ацыд ахуырты генералон репетици, цы ран хайад райстой уагдоны дӕлхайӕдтӕ. Ӕфсӕддонтӕ куыстой алыгъуызон хӕслӕвӕрдтӕ сӕххӕст кӕныныл – цы фиппаинӕгтӕ сбӕрӕг кодтой, уыдон иууылдӕр аиуварс кодтой, банысан кодтой Хъахъхъӕнынады министрады.
Ӕфсӕддонты цӕттӕкӕнынад басгӕрста хъахъхъӕнынады министр, инӕлар-лейтенант Гассеты Ибрагим.
"Хъахъхъӕнынады министрадӕн фадат ис сӕххӕст алы хӕслӕвӕрд дӕр, ӕмӕ мах уый хъуамӕ равдисӕм", - загъта министр.
Хӕстон ӕхстимӕ ахуыртӕ нывонд сты Фыдыбӕстӕ хъахъхъӕнӕджы бонӕн ӕмӕ Хуссар Ирыстоны Гарзджын тыхты сӕвзӕрды бонӕн.
