ЦХИНВАЛ, 3 мар - Sputnik. Дунейы раздӕры чемпион IBF ӕмӕ WBA верситӕм гӕсгӕ Гасситы Мурӕт гӕнӕн ис ауадза йӕ фыццаг тох суперуӕззау уӕзы 3 апрелы. Ахӕм информаци ныммыхуыр кодта MMABoxing.ru инсайдертыл ӕнцойгӕнгӕйӕ.
Дзыллон информацион фӕрӕзты (ДИФ) куыд нысан кӕнынц, афтӕмӕй ирон боксеры дебют ацӕудзӕн горӕт Сочийы. Гасситы Мурӕты фидӕны ныхмӕлӕууӕг нырма бӕрӕг нӕу.
WBA ӕмӕ IBF верситӕм гӕсгӕ дунейы экс-чемпион фыццаг уӕззау уӕзы Гасситы Мурӕт фарон апрелы ахызт суперуӕззау уӕзмӕ, фӕлӕ тренировкӕты рӕстӕджы райсгӕ травмӕты фӕстиуӕгӕн нал ауагъта тох Джоуи Давейкоимӕ, кӕцы хъуамӕ ацыдаид 27 июлы АИШ-ы. Февралы райдайӕны Эдди Херны Matchroom Boxing фехъусын кодта, Гасситы Мурӕт цӕттӕ кӕй у рахизын тохмӕ америкӕйаг Джерри Форресты ныхмӕ Майки Гарсия ӕмӕ Джесси Варгасы андеркарды. Фӕлӕ боксерӕн фӕзынд проблемӕтӕ спарринг-партнертӕ ссарынимӕ, уый фӕдыл дебют суперуӕззау уӕзы аргъӕвтой.
Ирон боксер Гасситы Мурӕт бахӕццӕ Ӕппӕтдунейон боксы суперсерийы финалмӕ, цы ран 2018 азы июлы фембылд украинӕйаг Александр Усикӕн. Финалон тохы фӕстӕ боксерӕн сарызтой операци йӕ уӕхскыл.
