ЦХИНВАЛ, 10 апр - Sputnik, Козаты Диана. Хуссар Ирыстоны аскъуыддзаг кодтой бакӕнын арӕнӕвӕрдтӕ адӕмы массон ӕмбырдтыл ӕхсӕнадон бынӕтты ӕмӕ автотранспорты змӕлдыл.
Афтӕ ма, хицауады рабадтыл майрӕмбоны аскъуыддзаг кодтой адарддӕр кӕнын уынаффӕ Уӕрӕсеимӕ арӕны уылты хизыныл тобӕ сӕвӕрыны фӕдыл. Уымӕй дарддӕр, хицауад адарддӕр кодта арӕнӕвӕрдон мадзӕлтты ӕмгъуыд, кӕцытӕ баст сты коронавирусы ныхмӕ тохимӕ ӕмӕ фыст сты хицӕн пункттӕй уынаффӕты, кӕцытӕ райстой 27 марты ӕмӕ фыццӕгӕм апрелы.
Хицауад бахӕс кодта райсын мадзӕлттӕ, цӕмӕй ма уадзой ӕмбӕстӕгты массон змӕлд ӕмӕ ӕмбырдтӕ ӕхсӕнадон бынӕтты, афтӕ ма арӕнӕвӕрдтӕ бакӕнын службӕйон ӕмӕ хисӕрмагонд автотранспорты змӕлдыл ӕнӕ ӕнӕмӕнгхъӕуындзинадӕй Хуссар Ирыстоны территорийыл.
Карантин ӕхсӕнадон бынӕтты ӕмӕ цӕрджытӕн лӕггӕдтӕ ӕххӕст кӕныны бынӕтты адарддӕр кодтой 20 апрелы онг. Уыцы бонмӕ ӕхгӕд уыдзысты кафетӕ, ресторантӕ, хӕрӕндӕттӕ, фитнес-центртӕ, рӕсугъддзинады салонтӕ, бассейнтӕ, спортивон комплекстӕ ӕмӕ базарадон центртӕ.
Кусдзысты ӕрмӕстдӕр хӕлцадон дуканитӕ ӕмӕ афтектӕ.
Амӕйразмӕ президент Бибылты Анатолий расидт 8-ӕй 20-ӕм апрельмӕ ӕнӕкусӕгон бонтӕ. Ӕхгӕд сты ахуырадон уагдӕттӕ ӕмӕ ӕхсӕнадон бынӕттӕ. Афтӕ ма сӕхгӕдтой Гуырдзыстонимӕ арӕн.
