ЦХИНВАЛ, 13 апр - Sputnik. Хуссар Ирыстоны барадхъахъхъӕнӕг органты кусджытӕ сӕ цӕст дардтой коронавирусы ныхмӕ карантинон мадзӕлттӕ ӕххӕст кӕнынмӕ Зазхӕссӕны бӕрӕгбоны рӕстӕджы Цхинвалы аргъуанты.
Республикӕйы Мидхъуыддӕгты министрады (МХМ) пресс-службӕ куыд хъусын кӕны, афтӕмӕй динон мадзӕлтты размӕ Милицийы сӕрмагонд нысаниуӕджы къорды (МСНК) инженерон-техникон хайады кусджытӕ багӕрстой аргъуанты территоритӕ. Афтӕ ма ӕрӕхгӕдтой аргъуанты цур уынгтӕ: Ирӕтты, Сомихӕгты, Донбылгӕрон ӕмӕ Джиоты Аланы проспект.
"Барадхъахъхъӕнджытӕ сӕвӕрдтой бацӕуӕнты контролон-уадзӕн пункттӕ ӕмӕ дезинфекци кодтой цӕрджыты къухтӕ дезинфекцион фӕрӕзтӕй. Алкӕцы аргъуаны раз дӕр лӕууыдысты милицийы кусджытӕ ӕмӕ сӕ цӕст дардтой карантинон фӕтктӕ ӕххӕст кӕнынмӕ", - дзырдӕуы МХМ хъусинаджы.
Амӕйразмӕ президент Бибылты Анатолий расидт 8-ӕй 20-ӕм апрельмӕ ӕнӕкусӕгон бонтӕ. Республикӕйы хицауад бакодта уӕлӕмхасӕн карантинон мадзӕлттӕ республикӕйы коронавирусы апарахат ма ‘руадзыны нысанӕн. Уӕрӕсеимӕ арӕн сӕхгӕдтой 1 майы онг. Марты республикӕйы къухдариуӕгад фехъусын кодта Гуырдзыстонимӕ паддзахадон арӕны сӕхгӕды тыххӕй. Республикӕйы ӕхгӕд сты ахуырадон уагдӕттӕ ӕмӕ ӕхсӕнадон бынӕттӕ. Кусынц ӕрмӕстдӕр хӕлцадон дуканитӕ ӕмӕ афтектӕ.
