ЦХИНВАЛ, 20 апр – Sputnik, Плиты Фатимæ. Хӕрзаудӕн фонд "Мах ныфс" бастдзинады компани "Остелеком"-имæ иумæ скъолаты дистанцион ахуыры рæстæгмæ сифтонг кæндзысты æнæаргъ интернетæй бирæсывæллонджын æххуысхъуаг бинонты, фехъусын кодта Sputnik фонды хистӕр Гаглойты Таира.
Хуссар Иры æппæт ахуырадон уагдæтты дæр марты кæрон бакодтой карантин, фæстæр Ахуырады министард банхъардта скъолаты ахуыр дистанцион форматмæ ракæнын. Ахуыргæнджытæ æвзарынц æндæр æмæ æндæр нывæзтытæ.
"Хӕрзаудӕн фонд "Мах ныфс" срæвдз кодта ацы куыст, разыйы дзуапп нын радта компани "Остелеком"-ы разамонæг Роман Коврига. Ахуырады министрадмæ мах бахатыдыстæм тыхст бирæсывæллонджын бинонты номхыгъдтæм, фæлæ нырма нæ къухы нæ бафтыдысты", - загъта Гаглойты Таира.
Уый ма банысан кодта, хæрзаудæн акци кæй аххæсдзæн æрмæст фондз æмæ фылдæр сабийы цы бинонты хъомыл кæны, уыдонæй æххуысхъуаг чи ис, уыдоныл.
Хӕрзаудӕн фонд "Мах ныфс" кусы 2012 азӕй фӕстӕмӕ. Амæй размæ йæ уæнгтæ срæвдз кодтой маскæтæ хуыйыны куыст æмæ къорд æндæр гуманитарон акцийы.
