ЦХИНВАЛ, 9 июн – Sputnik, Хъуылымбегты Азӕмӕт. Хуссар Ирыстоны сӕудӕджерадон-базарадон палатӕйы разамонӕг Ӕлборты Алан балӕвар кодта Тыбылты Александры номыл паддзахадон университетӕн рагон ӕрхуы ӕмӕ ӕвзист згъӕрӕхцатӕ, фехъусын кодтой Sputnik ХИПУ пресс-службӕйы.
Уникалон рагон згъӕрӕхцатӕ рауагътой ХVIII-XX ӕнусты.
Хуссар Ирыстоны паддзахадон университеты ректор Тедеты Вадим радзырдта Sputnik, ХИПУ музейон комплекс кӕй райста 500 экспонатӕй фылдӕр, кӕцытӕ хауынц историйы алыгъуызон периодтӕм.
"ХИПУ арӕзт цӕуы музейон комплекс, кӕцыйы ис зоологийы музей. Зоологийы музейӕ дарддӕр, мах нывӕндӕм балхынцъ кӕнын бӕстӕзонад ӕмӕ этнографийы музейы арӕзтад, цы ран хицӕнӕй уыдзысты хайӕдтӕ, кӕцытӕ нывонд сты Ирыстоны историйӕн, советон адӕмы Уӕлахизӕн Стыр Фыдысбӕстон хӕсты ӕмӕ ӕндӕрт цаутӕн. Абоны онг махӕн балӕвар кодтой 500 экспонатӕй фылдӕр, кӕцытӕ хауынц историйы алыгъуызон периодтӕм. Абон та бӕстӕзонады музейӕн радтой ӕвзист ӕмӕ ӕрхуы зӕгъӕрӕхцатӕ, кӕцытӕн ис стыр историон аргъ", - загъта Тедеты Вадим.
ХИПУ музейон комплексӕн радтой 54 экземпляры, уыдонӕй иууыл рагондӕр згъӕрӕхца рауагътой 1774 азы.
