ЦХИНВАЛ, 15 окт – Sputnik, Козаты Диана. Хуссар Ирыстоны коронавирусӕй фӕрынчынуӕвджыты иумӕйаг нымӕц схызт 197-мӕ. Ивгъуыд суткӕйы сбӕрӕг кодтой ноджы 24 рынчыны, фехъусын кодта "Центр гигиены и эпидемиологии"-йы сӕйраг дохтыр Томайты Зӕлинӕ.
"Мах сарӕзтам 81 анализы коронавирусы фӕдыл, 24 адӕймагӕн сбӕрӕг кодтой вирус", - загъта Томайты Зӕлинӕ.
Амӕй размӕ республикӕйы сӕйраг санитарон дохтыр Коцты Марина хъусын кодта, фӕрынчынуӕвджыты фылдӕр хайӕн кӕй ис пневмони. Уыимӕ иумӕ, ӕмбӕстӕгтӕ, кӕцытӕн низ цӕуы рог формӕйы, хос кӕнынц хӕдзарон уавӕрты.
Уӕрӕсеимӕ арӕны баконды фӕстӕ коронавирус сбӕрӕг кодтой 107 адӕймагӕн, пандемийы райдайӕнӕй та 197 ӕмбӕстагӕн.
Хуссар Ирыстоны ӕртыццӕджы дыууӕкъуырион карантиныл сӕхгӕдтой цалдӕр скъола ӕмӕ сабидоны.
