ЦХИНВАЛ, 25 янв – Sputnik, Козаты Диана. Цхинвалы ноджы авд уынджы сцалцӕг кӕндзысты ацы аз. Сӕ нымӕцы Мӕскуыйаг уынджы хай Хеиты хъӕуы онг – ацы районы адӕм бирӕ ӕзты дӕргъы хъаст кӕнынц рыг ӕмӕ цъыфы тыххӕй, ӕртӕ азы размӕ та митингмӕ дӕр рахызтысты.
Ӕртӕазон Инвестпрограммӕйы 2022 азмӕ нывӕндынц столицӕйы 25 уынджы арӕзтад, уыдонӕй аст фесты 2020 азы.
"Ацы аз сцалцӕг кӕндзысты Плехановы, Санахъоты Гришикы, Сабырады, Едысы ӕмӕ Саулохты Мухтары уынгтӕ. Афтӕ ма, сцалцӕг кӕндзысты Нарты уынджы алвӕндаг Плиты Ароны уынджы онг. Уый руаджы равдӕлон уыдзӕн 8-ӕм июны уынг", - загъта Sputnik арӕзтады министрады пресс-секретарь Тедеты Алена.
Йӕ ныхӕстӕм гӕсгӕ, ацы аз Инвестпрограммӕмӕ бахастой Мӕскуыйаг уынджы хай Хеиты хъӕуы онг, кӕцыйы дӕргъ у 500 метры.
2022 азы та Цхинвалы сараздзысты ноджы фараст уынджы: Сабанты Григорийы, инӕлар Санахъоты Владимиры, Сланты Леониды, Хъуылаты Созырыхъойы, Къозонты Сардионы, Гӕззаты Валерийы уынгтӕ, Вокзалгӕрон фӕзуат, Цоциты уынджы алвӕндаг, афтӕ ма Ирӕтты уынджы дыууӕ хай.
Ӕввахс дыууӕ азы инвестпрограммӕйы фӕлгӕтты ацы мадзӕлттӕн рахицӕн кӕндзысты 460 милуан сомы.
Афтӕмӕй Хуссар Ирыстоны паддзахадон бюджет нырма нӕ райстой, уый фӕдыл нӕ рахицӕн кодтой фӕрӕзтӕ дӕр Инвестпрограммӕйы реализацийӕн.
Хуссар Ирыстонӕн социалон экономикон ӕххуыс бакӕнын фӕдыл Инвестпрограммӕ 2020-2022 ӕзтӕм сфидар кодтой ӕхсӕнхицауадон къамисы рабадтыл 2019 азы апрелы.
Ӕртӕазон программӕйы, кӕцыйы бюджет у 4,5 миллиард сомы, ис 52 мадзалы, кӕцытӕ здӕхт сты социалон объектты дарддӕры арӕзтадмӕ.
