ЦХИНВАЛ, 10 мар - Sputnik, Хъуылымбегты Зӕлинӕ. Цхинвалы сног кодта йӕ куыст хӕрзаудӕн дукани "Рухсы тын", загъта Sputnik дуканийы хицӕуттӕй сӕ иу Хъуылымбегты Елена.
Йӕ ныхӕстӕм гӕсгӕ, фарон азы райдайӕны дукани сӕхгӕдтой коронавирусы пандемийы тыххӕй.
Фыццӕгӕм марты дуканийы дуӕрттӕ ногӕй бакодтой ӕххуысхъуаг адӕмӕн.
"Дукани кусы 12.00-ӕй 14.00 сахатмӕ, сабат ӕмӕ хуыцаубоны дӕр, цӕмӕй уыцы бонты цӕуой куысты рӕстӕджы фадат кӕмӕн нӕй ӕрбацӕуын, уыдон. Улӕфт бонтӕ махӕн уыдзысты дыццӕг ӕмӕ ӕртыццӕг", - банысан кодта Хъуылымбегты Елена.
Дуканимӕ гӕнӕн ис ӕрбахӕссын дзаумӕттӕ, чингуытӕ, хъазӕнтӕ, гигиенӕйы дзауматӕ. Уыдон уый фӕстӕ иууылдӕр байуарынц ӕххуысхъуаг адӕмӕн ӕмӕ сидзӕртӕн.
"Абоны бон дуканийы ис дзаумӕттӕ, чингуытӕ, къахыдарӕс, сывӕллӕтты къаласкӕтӕ ӕмӕ сынтӕджытӕ. Мах бузныг дзурӕм Хуссар Ирыстоны цӕрджытӕн, кӕцытӕ ӕххуыс кӕнынц хӕрзаудӕн дуканийӕн ӕмӕ ӕрбахӕссынц дзауматӕ ӕххуысхъуаг адӕмӕн", - загъта Хъуылымбегты Елена.
Цхинвалы хӕрзаудӕн дукани "Рухсы тын" бакодтой Хаситы Михаил ӕмӕ Хъуылымбегты Елена 2019 азы райдайӕны, президент Бибылты Анатолийы ӕххуысӕй.
