https://sputnik-ossetia.com/20220114/tsaman-khauy-ma-syvallony-iron-avzag-15209459.html

Цӕмӕн хъӕуы мӕ сывӕллоны ирон ӕвзаг?

Цӕмӕн хъӕуы мӕ сывӕллоны ирон ӕвзаг?

Sputnik Хуссар Ирыстон

Гуыцмӕзты Инна, Sputnik 14.01.2022 мӕ, Sputnik Хуссар Ирыстон

2022-01-14T13:13+0300

2022-01-14T13:13+0300

2022-01-14T17:13+0300

хуссар ирыстоны

ног хабӕрттӕ

репортажтӕ

зонад

https://cdnn1.img.sputnik-ossetia.ru/img/544/79/5447944_0:312:3001:2000_1920x0_80_0_0_92ee7efe789af815788ed49350271c88.jpg

Гуыцмӕзты Инна, SputnikИрон ӕвзаджы хъысмӕт рагӕй фӕстӕмӕ ӕвзӕрын кӕны катайдзинад ӕвзаджы дӕсныты, ахуыргӕнджыты ӕмӕ, ирон адӕмы сомбоныл чи хъуыды кӕны, уыдоны хсӕн. Куыд хъӕуы ӕвзаг бахъахъхъӕнын, уымӕн бӕлвырд рецепт ничи ма ссардта. Бирӕты хъуыдымӕ гӕсгӕ, ӕвзаг бавӕрынӕн хъӕуы паддзахадон программӕтӕ. Уыцы хъуыды, кӕй зӕгъын ӕй хъӕуы, раст у, фӕлӕ цард ӕмӕ практикӕ куыд равдыстой, афтӕмӕй фаг нӕу.Ирон ӕвзаджы уавӕр арӕх свӕййы быцӕуы аххосаг ӕрмӕст коллегӕты нӕ, фӕлӕ ма хӕлӕртты ‘хсӕн ныхасы дӕр. Чи дзуры, ома паддзахадӕй бирӕ аразгӕ у, чи та скъолайы ахуыргӕнджыты зылынджын кӕны, ома сӕ уроктӕ нӕ вӕййынц цымыдисон ахуыргӕнинӕгтӕн.Иу чысыл мын бантыст акусын скъолайы, ӕмӕ дзы иннӕ предмӕттӕм абаргӕйӕ, ирон авзаг ӕмӕ литературӕйы урок ницӕмӕй хицӕн кӕны. Мӕ бон нӕу зӕгъын, ӕмӕ уырыссаг, науӕд англисаг ӕвзаджы уроктӕ сты уӕлдай шедевралондӕр, фӕлӕ, цӕмӕдӕр гӕсгӕ, скъоладзаутӕ уыцы предметтӕ ӕнувыддӕрӕй ахуыр кӕнынц. Цӕмӕн? Ӕвӕццӕгӕн, уыцы ӕвзӕгтимӕ бӕттынц сӕ сомбоны цард ӕмӕ уымӕн.Ирон ӕвзаджы ахуыргӕнджытӕй уын кӕцыфӕнды дӕр радзурдзӕнис, ныййарджыты ‘рдыгӕй цас цӕлхдуртӕ ӕййафынц, уый тыххӕй. Уыдонӕй аразгӕ куы уаид, уӕд уыцы предмет нӕдӕр ахуыр кӕниккой скъолайы. "Цӕмӕн хъӕуы мӕ сывӕллоны ирон ӕвзаг? Уӕрӕсемӕ цӕуы ахуыр кӕнынмӕ, ӕмӕ йын ирон ӕвзагӕй цы нысӕнттӕ ис, уыдон ын фехалдзысты йӕ аттестат" - ахӕм ӕмӕ ма ноджы хаттӕй-хатт карздӕр ныхӕстӕ ис фехъусӕн ныййарджытӕй.Ӕвӕццӕгӕн сӕ тынг фӕхӕрам кӕнын нӕй гӕнӕн, уымӕн ӕмӕ алы ныййарӕджы дӕр фӕнды, цӕмӕй йӕ хъӕбул царды уа ӕнтысджын, ӕмӕ йӕ мацы бахъыгдара уый тыххӕй. Уый зӕгъын уымӕн, ӕмӕ ирон ӕвзаг ӕмӕ литературӕйы ахуыргӕнджыты куы аххосджын кӕнынц, уӕд бынтон раст нӕ вӕййынц.Мӕхимӕ уыцы стыр бӕрн нӕ исын, ӕмӕ зӕгъон, ӕвзаджы бахъахъхъӕнынӕн цы у мыдадзыхос, фӕлӕ царды практикӕйы цӕмӕн уыдтӕн ӕвдисӕн, цы бафиппайдтон, уый тыххӕй мӕ фӕнды зӕгъын мӕ хъуыды.Ничи гуырысхо кӕны, паддзахад кӕй хъуамӕ куса ӕвзаг бахъахъхъӕныны программӕйыл, ахуыргӕндтӕ ӕмӕ ӕвзагзонынады къабазы минӕвӕрттӕ кӕй хъуамӕ ӕххӕст кӕной сӕ куыст ӕнувыдӕй, уымӕн ӕмӕ ацы проблемӕ иумӕйаг у. Фӕлӕ мӕм фарст фӕзыны: цымӕ нӕ фысджыты чи ахуыр кодта мадӕлон ӕвзагыл дзурын? Чизоны йӕ сӕ райгуырдӕй фӕстӕмӕ хъуыстой мыййаг? Уыцы ӕвзаг сӕ мады ‘хсыримӕ нуӕзтой сӕ райгуырдӕй фӕстӕмӕ. Бынтон чысылӕй хъуыстой сӕ нанаты зард ӕмӕ рӕвдыд ныхас. Куы фестырдӕр сты, уӕд та сӕ фыдты зондамынд, сӕ ӕрвылбонон царды пайда кодтой ирон ӕвзагӕй, ӕмӕ сӕ сомбон дӕр уыимӕ уыд баст.Бирӕтӕ мемӕ нӕ вӕййынц разы, куы фӕзӕгъын, зӕгъгӕ, ӕвзаг бахъахъхъӕнын, фыццаджыдӕр, кӕй ис бинонты бӕрны, уымӕн ӕмӕ мад йӕ сабимӕ куыннӕ сдзура, куыннӕ йӕ барӕвдауа, зонд ын куыннӕ бацамона мадӕлон ӕвзагыл, уӕд паддзахӕдтӕн сӕ бон у ӕмӕ фыссой сӕдӕгай программӕтӕ - уыдонӕн ӕвӕрццаг фӕстиуджытӕ нӕ уыдзӕн.Мӕ мад ӕмӕ мӕм мӕ фыд чысылӕй иронау куыннӕ дзырдтаиккой, уыцы ӕвзаг куыннӕ суыдаид ӕрвылбонон, уӕд ыл, чи зоны, ныр ӕз дӕр уӕлӕхох уаин. Фӕлӕ ӕз ӕнӕ ирон ӕвзаг "Ӕз" нӕ уаин, цыфӕнды хорз ма дзурон ӕндӕр ӕвзӕгтыл, уӕддӕр.Кӕддӕр Интернеты социалон хызӕгтӕй сӕ иуы бакастӕн ӕвзонг чызджы хъуыдытӕ, зӕгъгӕ, ирон фысджытӕ нӕ хӕццӕ кӕныц уырыссаг ӕмӕ европӕйаг фысджыты ӕмвӕзадмӕ, ӕмӕ йын уый тыххӕй не сты цымыдисон. Мӕ цӕсты раз радыгай ауадысты: Токаты Алихан, Калоты Хазби, Гӕдиаты Секъа, Брытъиаты Елбыздыхъо, Малиты Георгий, Хаджеты Таймураз, Козаты Исидор, Хъодзаты Ӕхсар, Гуыцмӕзты Алеш, Дзуццаты Хадзы-Мурат ӕмӕ бирӕ ӕндӕртӕ. Уыдоны сфӕлдыстад хъӕздыг кӕны канд ирон ӕвзаджы нӕ, фӕлӕ ӕппӕт дунеон класикӕйы. Ӕмӕ цӕй мӕгуыр у уыцы адӕймаг, кӕцыйӕн йӕ бон нӕу бакӕсын ирон ӕмдзӕвгӕтӕ ӕмӕ романтӕ, уымӕн ӕмӕ сӕ нӕ бамбардзӕнис.Уӕдӕ цӕй мидӕг ис аххосаг? Мӕ хъуыдымӕ гӕсгӕ, нӕдӕр фысджыты, аххос у, нӕдӕр ахуыргӕнджыты, паддзахадон программӕйы ӕмӕ ма ноджы бирӕ ӕндӕр цӕйдӕрты. Ӕвзаг уарзын хъӕуы, ӕмӕ йӕ уарзгӕ та бакӕндзынӕ, чысылӕй йӕ куы хъусай, дӕ иууыл ирддӕр цаутӕ ацы ӕвзагимӕ баст куы уой, уӕд. Стӕй йын уый фӕстӕ феххуыс уыдзысты паддзахадон программӕтӕ дӕр. Ахуыргӕнджытӕн дӕр сӕ куыст фӕцымыдисондӕр уыдзӕн, ӕмӕ нын ирон фысджытӕ та нӕ миддуне бӕрӕг фӕхъӕздыгдӕр кӕндзысты.Мачи зӕгъӕт: ирон ӕвзагӕн сӕфӕн нӕй. Алцӕмӕндӕр ис сӕфӕн, куыннӕ йӕ бахъахъхъӕнай, уӕд.

https://sputnik-ossetia.com/20211108/sabitan-madalon-avzag-sakhuyr-kanynan-fazynd-nog-ualamkhasan-avdan-14636826.html

https://sputnik-ossetia.com/20200325/Bibylty-Anatoliy-bakhs-kodta-sarazyn-nog-programm-iron-vzag-m-zonady-rayrzty-fdyl-10309473.html

https://sputnik-ossetia.com/20190516/Gagloyty-Robert-nyfs-m-is-Khussar-Iry-fsivd-ky-n-fesafdzn-iron-vzag-8608058.html

2022

ног хабӕрттӕ

os_OS

хуссар ирыстоны, ног хабӕрттӕ, репортажтӕ, зонад