ЦХИНВАЛ, 21 янв – Sputnik, Козаты Диана. Хуссарирыстойнаг æртагласджытæ нырма нæ фæтыхстысты бензины цухдзинадæй. Æртаг ис горæты æппæт станцты дæр.
Транкавказы автомагистралыл фæндагон змæлд тобæгонд у æвдæм бон. Специалисттæ бæстонæй нæ дзурынц, кæд бакæндзæн фæндаг.
"Нырма фæразæм. Кризисон моментмæ нырма не ʻнхъæлмæ кæсæм", - загъта Sputnik "Югосетнефтепродукт" директор Джыгкайты Сослан.
Йæ ныхæстæм гæсгæ, æртаджы фæсауæрц нырма бирæ рæстæг сфаг уыдзæн. Сослан ма бафтыдта, хисæрмагонд æртагласджытæ дæр кæй нæ тыхсынц.
"Югосетнефтепродукт"-ы сæргълæууæджы ныхæстæ бæлвырд кæнынц шофыртæ дæр.
"Знон ныккодтон æртаг хисæрмагонд станцы. Уыд дзы, стæй дзы стыр радтæ дæр нæ уыд. Ӕвæццæгæн, æртагласджытæ, уавæр æмбаргæйæ, стыр гуырахст æрластой", - загъта шофыр Тыджыты Эльбрус.
Чысыл цухдзинад банкъардтой газæй, уый æппæт станцты нæй.