ЦХИНВАЛ, 20 фев дек - Sputnik, Козаты Диана. Хуссар Ирыстоны Мидхъуыддӕгты министрады (МХМ) сӕргълӕууӕг Наниты Игорь фехъусын кодта уагдоны архайды сӕйраг здӕхттӕ, кӕцыты фӕдыл хъӕуы фӕхуыздӕр кӕнын куыст.
МХМ пресс-службӕйы фехъусын кодтой, дыццӕджы уагдоны кӕй ацыд коллегийы рабадт, кӕцыйы рӕстӕджы хайадты разамонджытӕ радзырдтой сӕ куысты тыххӕй 2018 азы.
Афтӕ ма рабадты рӕстӕджы сбӕрӕг кодтой дарддӕры къахдзӕфтӕ, цӕмӕй ӕххӕст кӕной ӕхсӕнадон фӕтк, ӕмбӕстӕгты ӕдасдзинад ӕмӕ фӕкъаддӕр кӕной фыдракӕндты нымӕц республикӕйы.
"2018 уагъд ӕрцыд бирӕ егъау мадзӕлттӕ, ӕмӕ МХМ кусджытӕ ӕндӕр тыхон структурӕтимӕ архайгӕйӕ сӕххӕст кодтой ӕхсӕнадон фӕтк. Оперативон архайд иууылдӕр уыд здӕхт нӕ республикӕйы ӕмбӕстӕгты законон интерестӕ бахъахъхъӕнынмӕ", - загъта уагдоны сӕргълӕууӕг Наниты Игорь.
Уагдоны сӕйраг хӕслӕвӕрдтыл министр нымайы МХМ кусджыты профессионалон службӕйон архайд фӕфылдӕр кӕнын, тох кӕнын фыдракӕндты ныхмӕ ӕмӕ сбӕрӕг кӕнын ивгъуыд ӕзты фыдракӕндтӕ.
"Хъӕуы арӕхдӕр уадзын профилактикон ныхас цӕрджытимӕ ӕмӕ ӕнахъомтимӕ, афтӕ ма уагдоны кусджытимӕ дӕр службӕйон дисциплинӕйы фарстыты фӕдыл", - загъта Наниты Игорь.
Наниты Игорь бахахх кодта, зӕгъгӕ, хъӕуы фӕхуыздӕр кӕнын хъусдард фӕндагон змӕлды ӕдасдзинады фадыджы дӕр.
Рабадты кӕрон Наниты Игорь бафтыдта, бирӕ фарстытӕ кӕй аскъуыддзаг кодтой президент Бибылты Анатолийы ӕххуысы руаджы.