ЦХИНВАЛ, 26 июл – Sputnik, Козаты Диана. Хуссар Ирыстоны ӕнӕниздзинад хъахъхъӕнынады министрад аскъуыддзаг кодта ӕрранизы ныхмӕ вакцинӕйы цухдзинады проблемӕ, загъта Sputnik пресс-конференцийыл уӕрӕсейаг уынаффӕгӕнӕг Игорь Галь.
Амӕйразмӕ хуссарирыстойнаг медикты зӕрдӕ ӕхсайдта препаратты цухдзинадмӕ. Афтӕмӕй азы райдайӕнӕй фӕстӕмӕ срегистраци кодтой 300 куырдиатӕй фылдӕр медиктӕм куыйты фӕхӕцыны фӕдыл.
"Проблемӕ аскъуыддзаг кодтам. Фарст ис цӕстдарды бын", - загъта Игорь Галь.
Дзӕгъӕл куыйты проблемӕйы фӕдыл радзырдтой республикӕйы Мидхъуыддӕгты министрады дӕр. Уагдоны фехъусын кодтой, тӕссаг уавӕры рӕстӕджы кӕй хъӕуы фӕдзурын радгӕсон хайадмӕ, тыхон структурӕтӕн та бар ис пайда кӕнын хӕцӕнгарзӕй, цӕмӕй ӕнӕзианхъом скӕной сырды.