ЦХИНВАЛ, 12 окт — Sputnik, Плиты Фатимӕ. Быроны рацарӕзты фирмӕ "Читстый мир"-ы хъӕппӕрисӕй Хуссар Ирыстоны столицӕйы уынгты сӕвӕрдтой бырондӕттӕ гӕххӕт, пластик ӕмӕ алюминийӕн, фехъусын кодта Sputnik амалиуӕгады кусӕг Плиты Константин.
Фирмӕ Хуссар Ирыстоны архайы ныр ӕрдӕгазӕй фылдӕр, ацы ӕмгъуыд уыдон республикӕйы территорийӕ аластой 100 тонны бӕрц бырон - фондз хӕдтулгӕйы дзаг.
"Нӕ амалиуӕгад у социалон ӕмӕ коммерцион. Сӕвӕрдтам столицӕйы территорийыл 15 бырондоны ӕвзӕрст быронӕн. Кӕцыдӕрты ныппырх кӕнынц адӕм, фӕлӕ хъуыддаг срӕвдз ис", - радзырдта уый.
Плиты Константины ныхӕстӕм гӕсгӕ, бырон ӕвзарыны куыст ныббиноныг кӕныны хъуыддаг разынд, куыд хъуыды кодтой, уымӕй зындӕр.
"Мах куыд хъуыды кодтам, уымӕй хъуыддаг разынд зындӕр, фӕлӕ алцӕмӕн дӕр ис саразӕн. Иу азы ӕмгъуыдмӕ куыст афтӕ сӕвӕрын гӕнӕн ис ӕмӕ быроны 80 проценты лас цӕуа", - бафтыдта уый.
Уӕдӕй нырмӕ фирмӕйы кусджытӕ бынӕттон экологион организациимӕ ауагътой цалдӕр акцийы. Сӕ архайджытӕ свӕййынц скъоладзаутӕ ӕмӕ хистӕр кары адӕм. Уыдон канд быронӕй нӕ сыгъдӕг кӕнынц ӕрдз ӕмӕ столицӕ, фӕлӕ ма фидар кӕнынц рӕзгӕ фӕлтӕрты хсӕн алфӕмблайы сыгъдӕгдзинадмӕ аудгӕ ахаст.
Хуссар Иры столицӕйы фӕзынд ӕвзӕрст быроны асыкктӕ
© Sputnik / Фатима Плиева