ЦХИНВАЛ, 31 май — Sputnik, Плиты Фатимӕ. Хуссар Ирыстонӕй ацӕугӕ амалиуӕггӕнӕг Туаты Георгий йӕ райгуырӕн бӕстӕмӕ ӕрӕрвыста 10 мин уардийы лӕварӕн.
"Не 'мбӕстаг Туаты Георгий цӕры Цӕгат Ирыстоны, уымӕн йӕхицӕн ис стыр хъӕмуаттӕ ис ӕмӕ нын лӕварӕй ӕрӕрвыста уардитӕ", - радзырдта горӕты администрацийы сӕрдары фыццаг хӕдивӕг Пухаты Дмитрий.
Уый хӕрзгӕнӕгӕн йӕ фыццаг акци нӕу, цалдӕр азы размӕ ма уый ӕрӕрвыста Картлийы талатӕ Цхинвалӕн, уӕд уыдон не 'руагътой Джиоты Аланы проспектыл ныссадзын ӕмӕ сӕ ахастой Вокзалгӕрон фӕзуатмӕ.
Цхинвал сфӕлындзысты 10 мин уардийӕ
© Sputnik / Фатима Плиева
Дыццӕджы сӕумӕ райсом горӕты зӕлдфӕлындӕн дӕлхайады кусджытӕ бавнӕлдтой иу уӕзласӕн машинӕ уардитӕй ссӕрибар кӕнынмӕ.
"Садзӕм сӕ афтӕ, цӕмӕй ма дзы бынат баззайа къутӕр ӕмӕ бӕласы талатӕн. Стыр парчы фӕстӕ та дидинджыты иу хай ныссадзыстӕм Ногдзауты парчы",- загъта дӕлхайады сӕргълӕууӕг Пӕррӕстаты Ирина.
Йӕ ныхӕстӕм гӕсгӕ, Стыр парчы ныр дӕр зайы уардитӕ, уыдон та Хуссар Ирыстон райста лӕварӕй Донецкӕй.
"Донецкӕй дӕр райстам дыууӕ мин ӕмӕ ма сӕ ис ӕрмӕст 800, адӕм сӕ фӕдавтой. Ныр адӕммӕ хатӕм ам камератӕ ис ӕмӕ сӕхи худинаджы бынаты ма ӕвӕрой",- бафиппайдта уый.
Зӕлдфӕлындӕн дӕлхайады кусджытӕ ма хъазт, кӕнынц донхӕры дон кӕй нӕ арӕхсы Стыр паркмӕ.