ЦХИНВАЛ, 27 июл - Sputnik, Плиты Фатимӕ. Хуссар Ирыстоны мӕйы размӕ скуыста системӕ "Ӕдас горӕт". Ацы рӕстӕджы сӕдӕгай адӕймӕгтӕ райстой фӕндагон фӕткхӕлдты тыххӕй фыстӕджытӕ, бирӕтӕ семӕ разы не 'сты.
Цхинвалы цӕрӕг Козаты Владимир фӕстаг мӕй райста цыппар фыстӕджы, уыдон сты иууылдӕр, йӕ хӕдтулгӕ бар цас ис, уымӕй тагъддӕр кӕй цыд, уый тыххӕй. Фӕткхӕлдтӕ бӕрӕг ӕрцыдысты столицӕйы микрорайон Шанхайӕ рацӕуӕн трассӕйыл ӕмӕ Знауыры районы Аунеуы хъӕуы Паддзахадон автоинспекцийы посты цур.
Посты цур цы камерӕтӕ лӕууы, уыдонӕй нӕлгоймаг хъаст кӕны, камерӕтӕм хӕстӕг фӕдзӕхсты нысан кӕй нӕй, уый тыххӕй.
"Фӕдзӕхсты нысан дзы ис иу ран, фӕлӕ уый Знауыры районы рдӕм чи цӕуы, уыдонӕн у. Шанхайы та дзы бынтон никуы ис, камерӕ кӕй исы, уый фӕдзӕхсӕн нысан. Уымӕ гӕсгӕ нӕ дӕн разы фидын ивар", - загъта Владимир.
Паддзахадон автоинспекцийы разы сты, Аунеуы посты нырма фӕдзӕхӕсты нысӕнттӕ ӕххӕстӕй кӕй не сты ӕвӕрд. Уый тыххӕй хъӕуы автоинспекцийы фӕткхӕлдты автоматон фиксацийы управленимӕ бацӕуын хъаугъайаг фарсты фӕдыл.
"Горӕты ӕрбахизӕнты алы ран дӕр лӕууы, камерӕ кӕй исы, уый нысӕттӕ. Уымӕ гӕсгӕ шофыртӕн сӕ рӕдыдтытӕ горӕты территорийыл иууылдӕр хынцыд цӕуынц", - банысан кодта хистӕр автоинспектор Ходты Хох.
Паддзахадон автоинспекцийы фӕткхӕлдты автоматон фиксацийы управлени нырма ӕххӕст гуырахстӕй нӕ кусы, бафтыдта уый.
Комплексон автоматизацигонд информацион системӕ арӕзт ӕрцыд, цӕмӕй райтынг кӕной фӕндагон змӕлды ӕдасдзинад. Йӕ арӕзтадмӕ Хуссар Ирыстоны бавнӕлдтой цалдӕр азы размӕ. Йӕ фӕлгӕтты самал кодтой ифтогад ӕрмӕгимӕ кусӕн центрӕн.