ЦХИНВАЛ, 25 авг — Sputnik. Зынгсирвæзтон æдасдзинады нормæтæ халджыты ныхмæ Хуссар Ирыстоны исдзысты административон æфхæрды мадзæлттæ, хъусын кæны республикæйы мидхъыддæгты министрады пресс-службæ.
Фæстаг къуыриты Хуссар Ирыстоны ис æнтæф боныгъæдтæ. Ӕнахуыр тæвдты фæстиуæгæн бирæбæрцæй фæфылдæр ис зынгсирвæзтты нымæц. Арæхдæр ссудзы хус кæрдæг быдырты æмæ цæхæрадæтты.
"Административон бæрнæй дарддæр ма фæткхалджыты ныхмæ гом цæудзысты уголовон хъуыддæгтæ дæр, кæд æмæ уыдон аххуысæй зынгсирвæзт скуынæг кæна фæллой, науæд та бахъыгдард уой адæм", - бафæдзæхстой министрады.
Уагдоны ма зæрдыл æрлæууын кодтой, æрдзы хъæбысы уæвгæйæ æнæмæнгхъæуæг кæй у аудгæ ахаст дарын æмæ æдасдзинады домæнтæ æххæст кæнын.