ЦХИНВАЛ, 3 апр – Sputnik, Гӕбӕраты Элина. Хуссар Ирыстоны арӕзтады министр Елдзарты Константин радзырдта, ӕввахс рӕстӕджы кӕй райдайдзӕн магистралон доны хахх "Едыс-Цхинвал"-ы реконструкци, кӕцы ифтонг кӕны донӕй столицӕ.
Йӕ ныхӕстӕм гӕсгӕ, реконструкцийы фӕлгӕтты арӕзт ӕрцӕудзысты аварион хӕйттӕ.
"Реконструкци фадат ратдзӕн фӕфылдӕр кӕнын нуазыны доны гуырахст уӕлӕмхас доны хаххытӕ баиу кӕныны руаджы. Проект у дӕргъвӕтин, иу азмӕ нӕ фӕуыдзӕн",- загъта уый.
Уый ма хъусдард аздӕхта, доны хахх хӕххон бынаты кӕй ис, уымӕ гӕсгӕ йӕ арӕзтад уыдзӕн вазыгджын.
"Проект ӕххӕст цӕудзӕн фондз-ӕхсӕз азы ӕмӕ йыл бахардз уыдзӕн 600 милуан сомы", - бафтыдта министр.