ЦХИНВАЛ, 26 окт – Sputnik, Козаты Диана. Боксæй дунейы чемпион Гасситы Мурæт, кæцымæ январы æнхъæлмæ кæсы тох кубинаг Юниер Дортикосимæ, адарддæр кæндзæн тренировкæтæ Америкæйы, фехъусын кодта Sputnik боксеры тренер Сланты Виталий.
Гасситы Мурæт 22 октябры арвыста нокауты польшæйаг Кшиштоф Влодарчикы. Ацы уæлахиз ирон боксерæн фадат радта Ӕппæтдунейон боксерон суперсерийы финалмæ ахизын, уымæй дарддæр ма Мурæтæн уый ссис йæ фыццаг тох IBF версимæ гæсгæ фыццаг уæззау уæзы чемпионы титул бахъахъхъæныны фæдыл.
"Мурæт адарддæр кæндзæн тренировкæтæ Америкæйы, Big Bear базæйы. Абель Санчес у иттæг хорз тренер. Уыдонæн Мурæтимæ ис кæрæдзи æмбарынад. Æмæ дзы уавæртæ дæр ис иттæг хорз", — загъта Виталий.
Гасситы Мурæты æмæ Юниер Дортикосы тох ацæудзæн 2018 азы январы дыккаг æмбисы, Америкæйы.
24-аздзыд Гасситы Мурæт профессионалон рингыл ауагъта 25 тохы æмæ 25-æй дæр рахызт уæлахиздзауæй, уыдонæй 18 – нокаутæй.
