ЦХИНВАЛ, 1 мар — Sputnik, Тадтаты Андрей. Фæстаг рæстæджы Хуссар Ирыстоны паддзахадон университеты цур автоскъолайы ахуыр ссис æнæмæнгхъæуæг домæн шофыры бартæ райсынæн. Хуссар Ирыстоны хицауад закъонмæ ивындзинæдтæ куы бахаста, уæдæй фæстæмæ шофыры бартæ райсæн ис æрмæстдæр автоскъолайы. Уый фæрцы хицауады ныфс ис фæбæрзонддæр кæнын фæндæгтыл æдасдзинад, цыран фæстаг рæстæджы фæфылдæр авариты нымæц. Æмæ кæд баххæстгæнинæгты нырма парламент не ‘сфидар кодта, уӕддӕр Паддзахадон автоинспекци ныридæгæн бартæ райсыны тыххæй фæлварæнтæм нал уадзы автоскъолайы ахуыр æнæ рацæугæйæ (раздæр ахæм практикæ уыд тынг арæх).
Цалдæр азы размæ ахæм ногдзинадæн нæ уыдаид гæнæн, уымæн æмæ республикæйы иунæг автоскъола уыд Мидхъуыддæгты министрады дӕлбар æмæ йæ мæгуыр материалон-техникон фæрæзтæ нæ дæттой æмбæлон ахуыр.
2013 азы ХИПУ-йы ректор ссис Тедеты Вадим. Республикæйы машинæты нымæц бонæй бонмæ фылдæн кæй кæны, уый хынцгæйæ ног бынаты йӕ сæйраг хæслæвæрдтæй уый банымадта уæлдæр ахуырадон уагдоны цур автоскъола саразын.
"Автоскъолайы бартæ райсыны фадат ис æрмæстдæр ахуыр рацæуыны фæстæ. Уырдæм ахуырмæ чи цæуы, уыдон хъуамæ æнæмæнгæй рацæуой практикон æмæ теоретикон ахуырты æххæст курс. Ацы домæн алкæмæн дæр у æнæаивгæ", — загъта ХИПУ-ы ректор Sputnik уацхæссæгæн.
Тедеты Вадимы ныхæстæм гæсгæ, шофыры бартæ райсыны ног домæнтæ фæфылдæр кодтой автоскъоламæ бацæуын кæй фæнды, уыдон нымæц. Фæлæ ректоры ныфс ис, ацы проблемæ аскъуыддзаг кæнын ахуырадон машинæты парк æмæ инструкорты нымæц фæфылдæр кæныны фæрцы.
"Ныридæгæн нæм ис фараст машинæйы, уыдонӕй æхсæз сты ног. Ныртæккæ ма æлхæнæм иу", — банысан кодта ректор.
Ахуыры аргъ у 5,8 мин сомы, ХИПУ-ы студенттæн ахуыры аргъ у æрдæгыл, ахуыргæнджытæн та — æнæаргъ.
"Ахуыры аргъ у минималон, уый куыддæрты æмбæрзы автоскъолайы хæрдзтæ, фæлæ мах уымæй нæ хъавæм æхцатæ кусын. Нæ сæйраг нысан у — фæндæгтыл æдасдзинад æмæ культурæйы æмвæзад фæбæрзонддæр кæнын", — банысан кодта Тедеты Вадим.
ХИПУ-ы цур автоскъола у иунæг Хуссар Ирыстоны. Йӕ уылты рацæудзысты фидæны шофыртæ иууылдæр, фæлæ ректоры ис фидар ныфс, кæй фæтых уыдзысты уыцы уаргъæвæрдыл.
"Мах стæм монополисттæ æмæ нæ фæнды афтæ баззайын", — загъта уый.
Автоскъолайы директор Василий Кулиджановы ныхæстæм гæсгæ, ахуыргæнинæгтæ дих сты цыппар къордыл, фæйнæ 30 адæймаджы иу къорды. Ахуыры курс у дыууæ мæй æмæ æрдæг — ахуыр цæуы къуыри æртæ хатты, иу урок цæуы иу сахат. Уыимæ иумæ ахуыргæнинæгтæ æнæмæнгæй рацæуынц куыд практикæ, афтæ теори дæр.
"Цæмæй фæцыбырдæр кæнæм рад, уый тыххæй бакæндзыстæм фæндзæм къорд. Уымæн мах балхæдтам ног машинæ. Практикон ахуыртæ уадзынц аст инструкторы, дыууæ ахуыргæнæг та — теори. Уæлдай хъусдард здахæм нæ кусджыты квалификацимæ, куыстмæ исæм æрмæстдæр фæлтæрд специалистты", — загъта автоскъолайы директор.
Ахуыры фæстæ фидӕны шофыртæ нырма раттынц скъолæйон экзаментæ, æнтыстджынæй сæ куы раттой, уæд сын лæвæрд цæуынц автоскъола рацæуыны фæдыл æвдисæндартæ. Уый фæстæ та фæлварæнтæ ратдзысты Паддзахадон автоинспекцийы.
Гатыгкоты Эдуард у скъæрыны фæдыл инструктор 25 азы стажимæ. Райдыдта кусын ДОСААФ-ы, уый фæстæ автоскъола нырма ахызт Хъахъхъæнынады министрады, стӕй та Мидхъуыддæгты министрады дæлбармæ.
"Уæд ахуыр нæ цыд æмбæлон æмвæзадыл — нæ фаг кодта бензин. Зæронд машинæтæ иудадзыг хæлдысты. Скъæрыны фæдыл уроктæ уагъд цыдысты къуыри иу хатт 15-20 минуты. Иу урокæй иннæмæ ахуыргæнинæгтæ рох кодтой рацæугæ æрмæг", — радзырдта инструктор.
Йæ ныхæстæм гæсгæ, инструкторы куыст у тынг уæззау, хъуамæ иудадзыг быхсай, иуæй иухатт та психолог хъуамæ уай.
"Вæййы афтæ æмæ фыццаг бонты ахуыргæнинаг "бандзыг" вæййы, нæ фембары элементарон æмбарынæдтæ. Цыма машинæйы пассажиры бынаты дæр никуы бадтис. Ахæм рæстæджыты йæ хъæуы æрсабыр кæнын, цæмæй баууæнда йæхиуыл æмæ бамбара, тæссагæй дзы кæй ницы ис", — банысан кодта Эдуард.
Уымæ æнæкæсгæйæ, йæ куыст уарзы æмæ нæ тыхсы, ног уагæвæрд кæй фæфылдæр кæндзæн уаргъæвæрд инструктортыл. Гатыгкоты Эдуарды ныхæстæм гæсгæ, фæстаг азты Цхинвалы машинæты нымæц кæй фæфылдæр, уый фæвазыгджындæр кодта шофырты цард, уымæ гæсгæ ног шофыры намысджынæй бацæттæ кæнын ныры хуызæн ахсджиаг никуыма уыд.
