ЦХИНВАЛ, 5 июл — Sputnik, Босыкты Наталья. Зассеты Зинаидӕ ӕмрӕстӕджы хӕст у дыууӕ нӕ, фӕлӕ ӕртӕ профессийыл — ӕххӕст кӕны цалцӕггӕнӕн куыстытӕ, хуыйы хуыссӕнгӕрзтӕ ӕмӕ ӕфснайы бӕстыхӕйттӕ. Фидар сылгоймаджы истори адарддӕр кодта Sputnik Хуссар Ирыстоны проект дыууӕ профессийыл хӕст адӕмы тыххӕй.
Зинаидӕ райгуырд бирӕсывӕллонджын бинонты ӕхсӕн, чысылӕй фӕстӕмӕ уый ӕххуыс кодта йӕ ныййарджытӕн ноджы ма фараст хомӕ кӕсын ӕмӕ хъомыл кӕнын. Уый арӕхстджынӕй каст сывӕллӕттӕм, уымӕ гӕсгӕ йӕ фыццаг куыст ссис сывæллонгæс. Фӕстӕдӕр та каст ацӕргӕ ӕвӕгӕсӕг адӕммӕ.
18-аздзыдӕй ацыд чындзы, 24 азмӕ йын уыд цыппар сывӕллоны.
"Тынг раджы ацыдтӕн чындзы. 24-аздзыдӕй мын уыд цыппар сывӕллоны, кӕцыты хъуыд къӕхтыл слӕууын кӕнын ӕмӕ сӕ фидӕныл хъуыды кӕнын. Мӕн бахъуыд бирӕ кусын, цӕмӕй мӕ сывӕллӕттӕ мацы хъуагдзинад ӕййафой", — загъта уый.
Ныртӕккӕ Зинӕ иугъуызонӕй фӕллой кӕны ӕртӕ къабазы дӕр.
Цалцӕг ӕмӕ арӕзтад
Зинаидӕ лӕууы авд адӕймаджы скондӕй аразджыты бригадӕйы сӕргъ. 2008 азы августы фӕстӕ, бригадӕ куыста цхинвайлаг ӕртыккаг ӕмӕ иуӕндӕсӕм скъолаты арӕзтады.
Гъӕдджын куысты ӕмӕ объект рӕстӕгыл эксплуатацимӕ лӕвӕрд кӕй ӕрцыд, уый тыххӕй Зинаидӕйы схорзӕхджын кодтой ӕхцайы премийӕ. Бригадӕ цалцӕггӕнӕн куыстытӕ ӕххӕст кӕны цхинвайлӕгты хисӕрмагонд хӕдзӕртты ӕмӕ фатерты, сӕйраджыдӕр косметикон цалцӕг. Куысты гуырахстмӕ гӕсгӕ ма Зинаидӕ ӕрбангом кӕны куыстмӕ цалдӕр кусӕджы, сантехник, электрикы.
Зинӕйы ныхӕстӕм гӕсгӕ, куысты тыххӕй йӕм арӕх ӕрбахатынц, арӕх бригадӕ иу объектыл бахъӕуы дыууӕ мӕйы онг.
"Стыр бӕрнимӕ ӕххӕст кӕнын мӕ куыст — хъавын арӕхстджын куыст кӕнын. Уымӕ гӕсгӕ хаттӕй-хатт иу объектыл мӕ бригадӕ бахъӕуы дыууӕ мӕйы онг, цӕмӕй бакӕнгӕ куыст уа ӕнӕаипп. Заказты хъуагдзинад не ййафын, фӕлӕ рӕстӕджы хъуагдзинады тыххӕй арӕх не сразы вӕййын ног куыст райсыныл", — загъта уый.
Хуыссӕнгӕрзты хуыйӕг
Цалцӕггӕнӕн куыстытимӕ ма Зинаидӕ хуыйы хуыссӕнгӕрзтӕ дӕр. Фыццаг Зинӕ къуымбилӕй хуыссӕнгӕрзтӕ сног кӕныныл куыста иунӕгӕй. Ацы куыст фыццаг бакастӕй куыд зыны, афтӕ ӕнцон нӕу.
"Рагзаманӕй къуымбил нымад у иууыл ӕнӕниз ӕмӕ сыгъдӕг ӕрмӕгыл. Фысы къуымбилӕй гобантӕ нымад цӕуынц фидар ӕмӕ ӕнӕниз фыны гарантыл. Къуымбилӕй хуыссӕнтӕн стыр аргъ ис абон дӕр", — дзуры уый.
Фӕстӕдӕр хуыссӕнгӕрзтӕ хуыйыны хъуыддагмӕ Зинӕ ӕрбангом кодта ноджы фондз сылгоймаджы, кӕцытӕ кусынц ӕрвылбондӕр, уымӕн ӕмӕ заказты нымӕц бонӕй бон кӕны фылдӕр. Фысы къуымбил Зинӕ балхӕны Ленингоры районы, стӕмдӕр хатт та Цӕгат Ирыстоны.
Фысы къуымбилӕй хуыссӕнгӕрзтӕ бахуыйынӕн фыццаг хъӕуы къуымбил ныхсын ӕмӕ хурмӕ басур кӕнын. Басургонд къуымбил хъӕуы ныддихтӕ кӕнын, сцӕгъдын ӕмӕ бырӕттӕй ссыгъдӕг кӕнын. Къуымбил ӕхсын ӕмӕ басур кӕнын иууыл хуыздӕр у сӕрдыгон рӕстӕг. Куы басур уа, уӕд ӕй нывӕрын хъӕуы хызыны ӕмӕ йӕ сраст кӕнын. Уый фӕстӕ райсын хъӕуы ставд ӕндах ӕмӕ барӕтауын хуыссӕнгарз.
Бӕстыхӕйтты ӕфснайӕг
Зинӕ дзуры, зӕгъгӕ, сывӕллонгӕсы ӕмӕ ӕвӕгӕсӕг адӕммӕ фӕкӕсыны фӕдыл куысты тыххӕй йӕм арӕх ӕрбахытынц, фӕлӕ йын уыйбӕрц рӕстӕг нӕй.
"Сразы уаин, фылдӕр сӕрибар рӕстӕг мын куы уаид, уӕд. Мӕ куысты режимимӕ ӕндӕр куыст кӕныны фадат нал ис", — дзуры сылгоймаг.
Кӕд Зинӕ ӕдзух ӕнӕвдӕлон у, уӕддӕр ӕфснайы цалдӕр организацийы.
"Сӕйраг куысты фӕстӕ, изӕрмӕ ӕввахс ӕз ӕфснайын бӕстыхӕйттӕ. Ӕхсызгон мын вӕййы бузныджы ныхӕстӕ хъусын хорз бакӕнгӕ куысты тыххӕй", — дзуры Зинаидӕ.
Цы у зынаргъдӕр
Зинаидӕйӕн зын у йӕ куыстытӕй иу рахицӕн кӕнын. Йӕ ныхӕстӕм гӕсгӕ, иууыл сӕйрагдӕр у куыст цӕсгомджынӕй ӕххӕст кӕнын, ӕмӕ цыфӕнды куыст кӕнгӕйӕ дӕр намысджын адӕймагӕй баззайын.
