ЦХИНВАЛ, 11 июл — Sputnik. Хуссар Ирыстоны командӕты ӕхсӕн футболӕй чемпионаты Кубок рамбылдта командӕ "Дыргуис" Цхинвалӕй, фехъусын кодта Sputnik ӕхсӕнадон организаци "Иры сомбон"-ы минӕвар Хӕбӕлаты Дианӕ.
Турнир байгом ивгъуыд къуыри, йӕ организатор уыд ӕхсӕнадон-политикон змӕлд "Иры сомбон". Ерыстӕ ацыдысты фыццаг хатт, фӕлӕ организаторты фӕнды уыдон ӕрвылазон саразын.
"Грамотӕтӕ, майдантӕ ӕмӕ уӕлахиздзауты кубок райста "Дыргуис"-ы командӕ. Уымӕй дарддӕр ма сын лӕвӕрд ӕрцыд 15 мин сомы. Чемпионат "Иры Сомбон"-ы Кубок уӕлахиздзаутӕм уыдзӕн иннӕ азмӕ, радон турниры онг", — загъта Хӕбӕлаты Дианӕ.
Йӕ ныхӕстӕм гӕсгӕ, дыккаг бынат райста Нӕузӕххонты микрорайоны командӕ, ӕртыккаг та — Хъайтарты уынджы командӕ "Лестер-Ир".
Дыккаг бынаты хицау райста приз — 10 мин сомы, ӕртыккаг бынат чи бацахста, уыдон та барӕвдыдтой фондз мин сомӕй.
Ӕдӕппӕт турниры хайад райстой 12 сывӕллӕтты футболон командӕйы Цхинвал ӕмӕ республикӕйы районтӕй.
