ЦХИНВАЛ, 27 июл — Sputnik,Козаты Дианӕ. Цӕгаттаг микрорайонты цӕрджытӕ фӕнд кӕнынц райдайын къухфысттӕ ӕмбырд кӕнын горӕты администрацимӕ курдиаты бын, горӕты бырондон ӕндӕр бынатмӕ, горӕт ӕмӕ цӕрӕн массивтӕй дӕрддзӕф ахӕссыны домӕнимӕ.
Раздӕр Sputnik фыста ацы проблемӕйыл, кӕцыйыл иу ӕмӕ дыууӕ хатт уынаффӕ нӕ цыд хицауад ӕмӕ парламенты, кӕдӕм цыдысты сӕ хъазтимӕ горӕты цӕрджытӕ. Фарон горӕты хицӕуттӕ фехъусын кодтой, бырондонон полигонӕн ног бынат кӕй хъуамӕ бацагурой Цхинвалы районы хицӕуттӕ. Ныр горӕты цӕрджытӕ, проблемӕйы скъуыддзагмӕ ӕнӕ банхъӕлмӕ кӕсгӕйӕ, ногӕй ныффыстой фыстӕг горӕты администрацимӕ.
"Мах бирӕ рӕстӕг ӕнхъӕлмӕ кӕсӕм, бырондон кӕд ахӕсдзысты ӕндӕр бынатмӕ. Раздӕр ацы проблемӕ афтӕ карзӕй нӕ лӕууыд, фӕлӕ ныр ӕвӕццӕгӕн территори байдзаг ӕмӕ фаг нал у ӕрмӕст бырӕттӕ судзын. Уымӕ гӕсгӕ изӕрыгон нӕй фадат нӕдӕр кӕрты сыгъдӕг уӕлдӕфмӕ абадын, нӕдӕр хӕдзары рудзынг бакӕнын — хӕдзар ӕвиппайды айдзаг вӕййы æвзæр смагӕй", — дзуры горӕты цӕрӕг Иринӕ.
Йӕ ныхӕстӕм гӕсгӕ, ӕвзӕр тӕф иууыл тынгдӕр вӕййы къӕвдабоны.
Горӕтмӕ ӕнгом, Къусреты полигонӕй пайдагонд цӕуы дӕс азӕй фылдӕр. Фӕлӕ тынг раджы байдзаг, уымӕн ӕмӕ фыццаг арӕзт ӕрцыд куыд хъӕбӕр цардуагон ӕвзарӕнты рӕстӕгмӕ быгъдон.
Цхинвалы мэр Ӕлборты Алан загъта Sputnik, зӕгъгӕ, ацы бынаты куыддӕр райдыдта кусын, афтӕ кӕй ӕрӕвӕрдта быгъдон ӕндӕр бынатмӕ ахӕссыны фарст алы структурӕйы раз дӕр, кӕцыты компетенцийы ис ацы проблемӕйы райхӕлд — Цхинвалы районы администраци, санитарон службӕ, ӕрдзхъахъхъӕнынады фӕдыл комитет.
"Ӕз бахатыдтӕн, цӕмӕй ӕрбавдисой ног полигоны оптималон бынат. Фӕлӕ ацы проблемӕ уӕлдӕфы ис ныр ӕртӕ азы дӕргъы. Цхинвалы районы бырӕтты полигоны уӕвынад принципиалон нӕу. Фӕлӕ районы сӕргълӕууӕг йӕ интервьютӕй иуы загъта, ӕз кӕй не сразы дӕн цы дыууӕ бынат мын ӕрбавдыста, уыдонӕй иуыл дӕр — иу дзы у ӕвӕрд горӕтмӕ ӕнгом, иннӕ та у ӕгӕр дард", — банысан кодта мэр.
Уый ныфс бавӕрдта, мэрия цӕттӕ кӕй у алы бынат дӕр сахуыр кӕнын, ӕмӕ ӕмбӕрстгонд кӕй у йӕ ӕнӕразыдзинад быгъдон дард бынатмӕ ахӕссын. Мэры ныхӕстӕм гӕсгӕ, быгъдонтӕ советон дуджы дӕр кӕй нӕ арӕзтой горӕтӕн дард, нӕ сӕ хӕссынц дард ныр дӕр Уӕрӕсейы, фылдӕр фадӕттимӕ горӕтты.
Мэр дӕнцӕгӕн ӕрхаста сыхаг Дзӕуджыхъӕу, уым быгъдон ӕвӕрд у горӕтгӕрон хъӕу Джызӕлмӕ ӕввахс — уым дӕр вӕййы ӕвзӕр смаг.
Ӕлборты Алан бамбарын кодта, цы миниуджытӕм гӕсгӕ цӕуы ӕвзӕрст ног полигон ӕмӕ цы хъӕуы хынцын йӕ равзӕрсты рӕстӕджы.
"Полигон хъуамӕ куса ӕнӕрлӕугӕйӕ сӕрдӕй-зымӕгӕй, ӕхсӕвӕй-бонӕй…Бырӕттӕ хъуамӕ ласт цӕуой суткӕйы мидӕг цалдӕр хатт ӕмӕ йӕ куыст хъуамӕ ма ныллӕууа иу бон дӕр. Полигоны бынатмӕ хъуамӕ уа иудадзыг ӕмӕ ӕнцон бацӕуӕн", — загъта уый.
Йӕ ныхӕстӕм гӕсгӕ, нысаниуӕг ис бырондоны бынатӕн дӕр. Бырон ныгӕныны рӕстӕджы хъуамӕ уа сӕрибарӕй ӕзмӕлыны фадат. Стӕй ма хынцын хъӕуы ӕртаджы хӕрдзтӕ дӕр.
"Адӕмы ӕнӕниздзинад ӕмӕ æнцойуатыл экономи кӕнын гӕнӕн нӕй, фӕлӕ хынцын хъӕуы горӕты бюджеты фадӕттӕ дӕр", — загъта Ӕлборты Алан.
Горӕты администраци бафыста бадзырд уӕрӕсейаг фирмаимӕ, кӕцы кусы бырон утилизацикӕныны фадыджы, сӕ минӕвӕрттӕ ныр цалдӕр мӕйы дӕргъы кусынц горӕты территорийыл. Фирма ӕрласта йӕхи ифтонгад, кӕцы хицӕн кӕны бырӕттӕ сӕ хуызмӕ гӕсгӕ — авг, гӕххӕт, згъӕр.
"Уагдон йӕ ифтонгад сӕвӕрдта раздӕры текстилон заводы территорийыл. Ӕппӕт бырӕттӕ пресс цӕуынц ӕмӕ ласт цӕуынц республикӕйы ӕддӕмӕ, дарддӕры рацарӕзты нысанӕн. Ацы механизм фадат дӕтты быроны 60% ласын ӕмӕ зынгӕ фӕкъаддӕр кӕнын быроны обаутӕ, стӕй ма зианхӕссӕг æппарæнтӕ уыдзысты зынгӕ цъусдӕр", — загъта мэр.
Уый ныфс бавӕрдта, бырондон ӕндӕр бынатмӕ кӕй ахӕсдзысты. Куыддӕр бырондоны бынат равзарой, афтӕ уымӕ хӕстӕг сӕвӕрдзысты быронæвзарӕн дӕр. Горӕты хицауы ныхӕстӕм гӕсгӕ, быронæвзарӕн амалиуӕгады минӕвӕрттӕ кусынц ацы фарстыл. Куыддӕр банымайой ӕппӕт хӕдзтӕ, афтӕ горӕты администраци семӕ сфидар кӕндзӕн бадзырд.
