Цхинвалы мэрия: хӕдзӕрттӕ райсдзысты ӕцӕг хъуагдзинад ӕййафӕг адӕм

© Sputnik / Алексей КовалевЗдания города
Здания города - Sputnik Хуссар Ирыстон
Бафыссын
Yandex newsTelegram
Хуссар Ирыстоны столицӕйы 2017 азы кӕронмӕ бахӕццӕ уыдзӕн 200 бинонтӕн ног микрорайоны арӕзтад. Горӕт Цхинвалы мэр радзырдта Sputnik, фыццаг рады кӕмӕ ӕмбӕлынц ног цӕрӕнуӕттӕ.

ЦХИНВАЛ, 22 авг — Sputnik, Козаты Дианӕ. Цхинвалы хицӕуттӕ хъуамӕ ауадзой хӕдзар райсынмӕ радты чи лӕууы, уыцы адӕмы ног рарегистраци, цӕмӕй сбӕлвырд кӕной ног микрорайоны фатертӕм претендентты хыгъдтӕ, загъта Sputnik горӕты мэр Ӕлборты Алан.

Фидӕн аз Цхинвалы кӕронмӕ бахӕццӕ уыдзӕн 200 бинонтӕн ног микрорайоны арӕзтад. Дыууӕ фондзуӕладзыгон корпусты уыдзӕн 80 иухатӕнон, 60 дыууӕхатӕнон, 55 ӕртӕхатӕнон ӕмӕ фондз цыппархатӕнон фатертӕ.

Сылгоймаг сывӕллонимӕ. Микрорайон Мӕскуыйаг - Sputnik Хуссар Ирыстон
Цхинвалы мэр: горӕты зӕххы фадыг райсын алкӕмӕн дӕр ис фадат

Цӕрӕнуатон фарст республикӕйы кӕддӕриддӕр цӕхгӕр лӕууыд. Цхинвалы ног микрорайонтӕ — "Мӕскуыйаг", "Цӕгаттаг" ӕмӕ "Хурзӕрин"-ы арӕзтадимӕ цӕрӕнуатон уавӕртӕ фӕхуыздӕр кӕныны фарст бирӕ бинонтӕн ахӕм ахсджиаг нал у.

"Рады лӕууӕг адӕмы хыгъдтӕ цӕттӕ цыдысты азгӕйттӕ, уымӕ гӕсгӕ сӕ сгардзыстӕм хӕдзӕрттӕ хицӕн кӕнын рӕстӕджы. Бӕрнонӕй дзурын, ног микрорайоны кӕмӕ не ‘мбӕлы, уыдонӕй иу адӕймаг дӕр нӕ райсдзӕн хӕдзар. Развӕлгъау хыгъдтӕ мыхуыр ӕрцӕудзысты массон информацийы фӕрӕзты, цӕмӕй рӕдыд ма ′руадзӕм", — загъта мэр.

Йӕ ныхӕстӕм гӕсгӕ, ног цӕрӕн массивы арӕзтады нысан у хӕдзӕрттӕ кӕмӕн нӕй, уыцы бинонты проблемӕ иу хаййӕ аскъуыддзаг кӕнын.

Раздӕр ног микрорайонты хӕдзӕрттӕ дих кӕныны хъуыддаг хаудта алыгъуызон хицауадон ӕмӕ ӕхсӕнадон организацитӕм. Сӕ куысты фӕстиуджытимӕ фӕстӕдӕр се ‘нӕразыдзинад равдыстой республикӕйы цӕрджытӕ. Бирӕтӕ нымадтой, хӕдзӕрттӕ рӕстагӕй дих кӕй нӕ цӕуынц. Ӕрцыд ма арӕзт ноджы иу къамис Ӕхсӕнадон палатӕйы цур, кӕцыйы скондмӕ бацыдысты барадхъахъхъӕнӕн органты минӕвӕрттӕ.

"Мӕ нымадмӕ гӕсгӕ, иу къамис дӕр хӕдбарӕй ма хъуамӕ дих кӕна хӕдзӕрттӕ, уымӕн ӕмӕ ӕввахс перспективӕйы горӕтӕн ахӕм фадат нал уыдзӕн ӕмӕ дзы хъуамӕ спайда кӕнӕм ӕмӕ хӕдзӕрттӕ рӕстагӕй байуарӕм. Мах ӕрбангом кӕндзыстӕм ӕхсӕнадон организацитӕ, массон информацийы фӕрӕзтӕ, барадхъахъхъӕнӕн органтӕ, цӕмӕй макӕмӕ баззайа фарстытӕ ӕмӕ дызӕрдыгдзинад, ног микрорайоны хӕдзӕрттӕ рӕстагӕй уӕрст кӕй ӕрцыдысты", — банысан кодта горӕты мэр.

Ӕлборты Алан бафиппайдта, хӕдзӕрттӕ уӕрст цӕудзысты, фатер райсыны радты цы адӕм лӕууынц, ӕрмӕст уыдон ӕрбавдисгӕ документтӕм гӕсгӕ нӕ, фӕлӕ ма "горӕты цур цӕрӕнуатон къамисы уӕнгтӕ адрестӕм гӕсгӕ зилдзысты алы бинонтыл дӕр ӕмӕ бынаты уындзысты, радты чи лӕууы, уыдонӕй алкӕй дӕр".

Цхинвал - Sputnik Хуссар Ирыстон
Мэрия: Цхинвалы цæгатварс объекттæ хъуамæ арæзт цæуой генпланмæ гæсгæ

"Сгардзыстӕм алы документ дӕр, фӕлӕ уал ӕнӕмӕнгхъӕуӕг у ногӕй регистраци ауадзын. Мӕйы ӕмгъуыдмӕ мах райдайдзыстӕм сыгъдӕг кӕнын хыгъдтӕ, кӕцытӕ арӕзт цыдысты азгӕйттӕ. Ӕлхынцъон верситӕ арӕзт ӕрцӕудзысты ӕввахс рӕстӕджы, ног регистрацийы фӕстӕ, цӕмӕй мачи дызӕрдыг кӕна — цӕрӕнуӕттӕ райсдзысты, ӕцӕг хъуагдзинад чи ӕййафы, уыцы ӕмбӕстӕгтӕ", — загъта мэр.

Уый бафтыдта, горӕты администрацийы цӕрӕнуатон къамисмӕ ныридӕгӕн кӕй бадӕттой 1800 куырдиатӕй фылдӕр, ӕмӕ сӕ нымӕц бонӕй бон кӕны фылдӕр.

Хӕдзар райсынмӕ чи ӕнхъӕлмӕ кӕсы, уыдон адих кодтой 15 категорийыл. Цӕрӕнуатон къамис сгары алы документ дӕр, индивидуалон ӕгъдауӕй ахуыр кӕны алы куырдиат дӕр. Къамисы уӕнгтӕ саразынц басгӕрсты акт, цӕмӕй сбӕлвырд кӕной, кӕцы категорийы бакӕной иу кӕнӕ иннӕ бинонты.

Ӕлборты Аланы ныхӕстӕм гӕсгӕ, фыццаг рады хӕдзӕрттӕ райсдзысты бирӕсывӕллонджын бинонтӕ, хӕстон архӕйдтыты рӕстӕджы фӕмардуӕвджыты ӕмӕ чи фӕцӕф, уыдоны бинонтӕ.

Ног хабӕртты лентӕ
0