ЦХИНВАЛ, 24 авг — Sputnik, Хъотайты Мария. Цхинвалы мэрия горӕты цады цур сӕвӕрдта чысыл стендтӕ, кӕцытӕ сидынц донуаты найынӕй хиуыл фӕхӕцын. Ахӕм амонӕгтӕ ӕвӕрд ӕрцыдысты Югосетпотребнадзоры барфыстмӕ гӕсгӕ, загътой Sputnik Хуссар Ирыстоны столицӕйы администрацийы пресс-службӕйы.
"Ленккӕнджыты фӕдзӕхсынӕн горӕты цур амонӕгтӕ сӕвӕрыны тыххӕй барфысттӕ Югосетпотребнадзор ӕрвыста раздӕр дӕр. Мэрия сӕвӕрдта ацы амонӕгтӕ, цӕмӕй хинайджытӕ сӕхи бахизой тӕссаг хъуыддагӕй", — загъта мэрияйы минӕвар.
Югосетпотребнадзоры сӕргълӕууӕг Коцты Маринӕйы ныхӕстӕм гӕсгӕ, ацы аз ӕнӕхъӕн найӕн сезон горӕты цады доны санитарон уавӕр нӕ дӕтта дзуапп ӕмбӕлон нормӕтӕн.
"Ӕнӕхъӕн найӕн сезон Югосетпотребнадзоры кусджытӕ иу ӕмӕ дыууӕ хатты нӕ истой доны хуызӕгтӕ цадӕй химикон ӕмӕ бактериологон анализ саразынӕн. Фӕстиуджытӕ равдыстой, горӕты дон дзуапп кӕй нӕ дӕтты санитарон нормӕтӕн. Доны уӕвы тъӕнгты палочкӕйы къорды бактеритӕ. Уый тыххӕй мах регулярон ӕгъдауӕй хъусын кӕнӕм массон информацийы фӕрӕзты руаджы ", — загъта Коцты Маринӕ.
Уый банысан кодта, кӕй фӕлвӕрдтой дон сыгъдӕг кӕныны тыххӕй алыгъуызон амӕлттӕ, фӕлӕ практикӕйы разындысты ӕнӕэффективон, уымӕн ӕмӕ цадмӕ дон ӕппынӕдзухӕй цӕуы цӕугӕдонӕй.
"Канал у чъизи, Леуахийы дон у чъизи, уымӕ гӕсгӕ хлор не ′скъуыддзаг кӕны чъизи доны проблемӕ", — бафтыдта уый.
Фӕдзӕхстытӕм ӕнӕкӕсгӕйӕ, цхинвайлӕгтӕ уӕддӕр, куыддӕр сын фадат фӕвӕййы, афтӕ сӕхи ауазал кӕнынц цады доны. Ам ма райсомӕй арӕх ис фенӕн кæсагахсджыты ӕнгуыртимӕ. Чидӕртӕ найынц сӕ куыйты.
"Ӕрвылрайсом дӕр лидзын цады алыварс. Уый фӕстӕ мын ӕхсызгон вӕййы уазал доны хи анайын. Найын кӕй нӕй гӕнӕн, уыцы фыстытыл нырма ацы бонты схӕцыд мӕ цӕст ӕмӕ сывӕллӕтты нал бауагътон найын фӕхъӕстӕйы тасӕй ", — дзуры горӕты цӕрӕг Тыджыты Эдуард.
Горӕты хицӕутты ӕмӕ Югосетпотребнадзоры фӕдзӕхстытӕ цы адӕм ницӕмӕ дарынц, уыдон тыххӕй та цады ӕрвылбон радгӕсад хӕссынц ирвӕзынгӕнджытӕ.
