ЦХИНВАЛ, 31 окт — Sputnik. Ӕхсӕз горӕттаг уынджы, кӕцытӕ хаст сты 2016 азы Инвестпрограммӕмӕ, ныридӕгӕн сты хӕрзарӕзт, ноджы ма фондз та лӕвӕрд ӕрцӕудзысты эксплуатацимӕ ацы азы кӕрон, фехъусын кодтой Sputnik къуырисӕры Хуссар Ирыстоны арӕзтады министрады пресс-службӕйы.
Министрады банысан кодтой, цалцӕггӕнӕн куыстытӕ ӕххӕстӕй ныридӕгӕн кӕй фесты Цхинвалы, Кобылы фырты, Остъайы фырты, Интернационалон, Гаглойты фырты ӕмӕ Горькийы уынгтыл.
Тугъанты Махарбеджы уынгыл цалцӕггӕнӕн куыстытӕ кӕронмӕ фӕхӕццӕ кӕнынц, кусджытӕ ӕвӕрынц асфальты дыккаг цъар. Дарддӕр райдайдзыстӕм кусын Хетӕгкаты Къостайы уынгыл. Ууыл куыстытӕ сты ӕххӕст, баззад ма сцалцӕг кӕнын чысыл фадыг, кӕцы раздӕр бындурон проектмӕ нӕ бахауд", — загътой арӕзтады министрады.
Иннӕ мӕйы та фӕнд кӕнынц асфальтӕй бамбӕрзын Хуыбылты Валерийы уынг (Цхинвалы цӕгаттаг хай). Ацы уынджы дыккаг хай — Фӕскъомцӕдисы уынгыл кусджытӕ вӕрынц канализацион хӕтӕлтӕ къӕвдайы донӕн, уымӕй дарддӕр уынджы дыккаг хай ӕмбӕзт у асфальты фыццаг цъарӕй.
"Асфальты фыццаг цъарӕй ӕмбӕрзт у сыхаг Дзаттиайы фырты уынджы хай. Иннӕ хайыл дӕр дарддӕр фӕндаг цӕттӕ кӕнынц асфальтӕй ӕмбӕрзынмӕ, афтӕ ма арӕзт цӕуынц тротуартӕ", — банысан кодтой уагдоны.
Централон Сталины уынгыл (Пушкины уынгӕй Абайты Уасойы уынджы онг) кусджытӕ айгӕрстой дӕлзӕхх коммуникацитӕ иууылдӕр, ныр уыдон ӕвӕрынц донисӕнтӕ ӕмӕ бордюртӕ.
Уымӕй дарддӕр ма, ацы азы кӕронмӕ нывӕзты ис сцалцӕг кӕнын 13 Коммунарты уынг, кӕцы нӕу хаст Инвестпрограммӕйы фӕлгӕтты 2016 азы цы объекттӕ хъуамӕ ӕрцӕуой цалцӕг, уыцы номхыгъдмӕ.
Ацы уынгыл цалцӕггӕнӕн куыстытӕ ӕххӕст цӕуынц горӕт Цхинвалы администрацийы ресурстӕй ӕмӕ уый дӕр эксплуатацимӕ лӕвӕрд ӕрцӕудзӕн ацы азы кӕронмӕ.
Министрады пресс-службӕйыфехъусын кодтой, ӕппӕт ацы уынгтыл хӕрзарӕзтон куыстытӕ кӕронмӕ ӕххӕст кӕй ӕрцӕудзысты мӕйы ӕмгъуыдмӕ.
2016 азмӕ Инвестпрограммӕйы фӕлгӕтты 11 уынджы хӕрзарӕзтадӕн рахицӕн ӕрцӕудзӕн 260 милуан сомы, ноджы ма 220 милуан сомы та рахицӕн ӕрцӕудзӕн арӕзтадон монтажӕн, уырдӕм хауынц газы, доны ӕмӕ кабелон хӕтӕлты айгӕрст.
