ЦХИНВАЛ, 9 ноя — Sputnik. Легендарон полярон экспедициты архайæг Кучиты Юрийæн Дзæуджыхъæуы сараздзысты ӕртӕметрон бронзæ цырт, хъусын кæны ПТРК "Алания".
Монументы авторы сбæрæг кодта конкурс. Бæстæйы хуыздæр 30 скульпторы куыстыты хсæн жюри равзæрста зындгонд мæскуыйаг нывгæнæг Злотяй Юрийы эскиз.
"Дзæуджыхъæуы тагъд рæстæджы фæзындзæн ног зæрдылдарæн бынат. Коцойты Арсены уынгыл легендарон полярон экспедициты архайæг Кучиты Юрийæн æвæрд æрцæудзæн цыртдзæвæн. Уыдзæн бронзæйæ конд. Фæнд æй кæнынц æртæ метры бӕрзӕндӕн скæнын", — дзырдæуы хъусинаджы.
Цыртдзæвæн сæвæрыны хъуыды æрцыд арктикон капитаны хæлар æмæ ʻмкусæг Епхиты Георгимæ. Ныр та йæм ис ахæм хъуыды: легендарон гоймаджы ном хъуамæ хæсса æппæтæй нырыккондæр æмæ фидардæр ледокол.
Цыртдзæвæн æвæрд æрцæудзæн Дзæуджыхъæуы администрацийы æмæ æхсæнадон змæлд "Нацийы æнæниздзинадæн"-ы æххуысæй.
