ЦХИНВАЛ, 13 дек — Sputnik. Фыццаг сылгоймаг-дирижер Дудараты Вероникæ ӕмӕ маэстро Гергиты Валерийы нӕмттӕ ратдзысты Дзæуджыхъæуы уынгтæн, хъусын кæны Цæгат Ирыстоны сæргълæууæг Битарты Вячеславы ныхæстæ ПТРК "Алания".
Ацы фæнды тыххæй Битарты Вячеслав фехъусын кодта Дудараты Вероникæйы 100 азы юбилейон мадзæлтты рæстæджы, кӕцытӕ уагъд ӕрцыдысты къуырисæры Мæскуыйы. Юбилейы фӕлгӕтты Мæскуыйы консерваторийы стыр залы ацыд концерт маэстро Гергиты Валерийы разамындæй. Номдзыд ирон сылгоймаджы номарæн изӕрмӕ æрцыдысты уазджытæ Дзæуджыхъæу æмæ Цхинвалæй.
"Дзæуджыхъæуы фæзындзæн дыууæ ног уынджы, кæцытæ хæсдзысты Дудараты Вероникæ æмæ Гергиты Валерийы нæмттæ. Мах хъуамæ кад кæнæм не ʻмзæххонтæн, неʻхсæнӕй куы фæхъуыдысты, уæд нæ, фæлæ ма сæрæгæс куы сты, афтӕмæй. Гергиты Валерийы цас лæггад кæны Ирыстонæн, уый хынцын хъӕуы", — банысан кодта Битарты Вячеслав.
Дудараты Вероникæ — Советон Цæдисы, Уæрæсейы, Удмуртийы æмæ Цæгат Ирыстон — Аланийы адæмон артисткæ. Хицӕн ӕзты куыста Мæскуыйы академион симфонион оркестры дирижёрӕй, сæйраг дирижёрӕй æмæ аивадон разамонæгӕй. 1991-2009 ӕзты та разамынд лæвæрдта Уæрæсейы симфонион оркестрæн. У бирӕнымӕц хæрзиуджытæ æмæ кадджын нæмтты хицау. Зынгӕ ирон режиссер амард 2009 азы 15 январы Мæскуыйы. Фыццаг сылгоймаг-дирижеры ном хаст æрцыд Гиннесы рекордты чиныгмæ.
Гергиты Абисалы фырт Валерий у советон æмæ уæрæсейаг дирижер, Мариинаг театры аивадон къухдариуæггæнæг, Лондоны симфонион театры сæйраг дирижер. У Уæрæсейы адæмон артист.
