ЦХИНВАЛ, 15 мар — Sputnik. Хуссар Ирыстоны президентон ӕвзӕрстыты хайад райсдзысты ӕртӕ кандидаты — архайгӕ президент Тыбылты Леонид, парламенты спикер Бибылты Анатолий ӕмӕ РХИ ПӔК-ы кусӕг Гаглойты Алан.
Раздӕр, бафыссӕн гӕххӕттыты рӕдыдтытӕ уагъд кӕй ӕрцыд, уый тыххӕй Хуссар Ирыстоны централон æвзарæн къамис не стрегистраци кодта президенты бынатмæ кандидаттæй аразӕг Багаты Амиран ӕмӕ депутат Къозонты Аланы.
Ӕртӕ срегистрацигонд кандидатӕн майрӕмбоны фадат уыдзӕн хайад райсын теледебатты.
"Центрӕвзӕрсткъам ныридӕгӕн сфидар кодта кандидаттӕн эфирон рӕстӕг, уый нымӕцы ӕнӕаргъ рӕстӕг дӕр. График ӕрӕмдзыхгонд ӕрцыд кандидаттимӕ", — загътой Sputnik ЦӔК-ы.
ЦӔК нырма нӕ аскъуыддзаг кодта бюллетенты дырыс нымӕц, "фӕлӕ ныридӕгӕн фидар ӕрцыдысты республикӕйы ном раивыны фӕдыл референдумы ӕмӕ президентон ӕвзӕрстыты бюллетенты текст ӕмӕ хуыз".
Ӕвзӕрстытӕ ӕмӕ референдум Хуссар Ирыстоны уагъд ӕрцӕудзысты 9 апрелы.
