ЦХИНВАЛ, 15 мар — Sputnik. Хуссар ӕмӕ Цӕгат Ирыстон бафыстой ӕхсӕнадӕмон бадзырд туризмы къабазы ӕмгуыстады фӕдыл, фехъусын кодта РХИ фӕсивӕдон политикӕ, спорт ӕмӕ туризмы фӕдыл комитеты сӕргълӕууӕг Зассеты Сергей.
"Ивгъуыд азы дӕргъы Цӕгат Ирыстоны туризмы комитетимӕ иумӕ мах бакуыстам маршруттыл, кӕцытыл туристтӕн уаид фадат ӕрцӕуын Хуссар Ирмӕ дӕр. Маршрутты сконды сты республикӕйы культурон бынты иууыл нысаниуӕгджындӕр объекттӕ", — банысан кодта комитеты сӕргълӕууӕг.
Ӕмгуыстады фӕдыл бадзырд ахъаз уыдзӕн Ирыстоны дыууӕ хайы туристон продуктты размӕцыды фӕдыл иумӕйаг мадзӕлттӕ уадзын, Хуссар ӕмӕ Цӕгат Ирыстоны туристон агентадтӕ та кӕндзысты ӕмархайд.
Бадзырд бафыст ӕрцыд 11 марты туристон равдысты "Интурмаркет-2017" Мӕскуыйы. Официалон документы бын сӕ къухтӕ бафыстой РХИ фӕсивӕдон политикӕ, спорт ӕмӕ туризмы фӕдыл комитеты сӕргълӕууӕг Зассеты Сергей ӕмӕ РЦИ — Аланийы туризмы комитеты сӕрдар Гӕджиты Вильям.
Зассеты Сергейы ныхӕстӕм гӕсгӕ, хуссарирыстойнаг фарсӕн у ӕнӕмӕнгхъӕуӕг ахӕм равдыстты хайад исын, цӕмӕй зоной, Уӕрӕсейы горӕттӕ туристтӕн цы лӕггӕдтӕ ӕнхъарынц, уый.
Уымӕй дарддӕр ма комитет кусы республикӕйы туризмы райрӕзты концепцийыл, кӕцыйы фӕрцы ведомствӕ нывӕнды Хуссар Ирыстонмӕ туристты нымӕц фӕфылдӕр кӕнын.
