ЦХИНВАЛ, 19 апр — Sputnik. Хуссар Ирыстоны Хъахъхъæнынады министрады æфсæддон службæгæнджытæ æрæвнæлдтой Уæлахизы парады репетицитæм, 9 майы сæйраг мадзалмæ цæттæгæн куыстытæ цæуынц 4-æм уæрæсейаг æфсæддон базæйы плацыл Цхинвалы, фехъусын кодтой Sputnik РХИ хъахъхъæнынадон уагдоны пресс-службæйы.
Ацы аз 9 майы нысан цæуы Советон Цæдисы адæмы Стыр Фыдыбæстæйон хæсты фæуæлахизыл 72 азы сæххæсты бон. Æрвылазон традицимæ гæсгæ, Хуссар Ирыстоны столицæ æмæ районты ацæуыдзысты цытджын мадзæлттæ æмæ хæсты ветерантæн цыткæнынад.
9 майы парады хайад райсдзысты Хъахъхъæнынады министрады парадон къордтæ, мидхъуыддӕгты министрады, паддзахадон ӕдасдзинады комитеты, уæрæсейаг æфсæддон базæ æмæ УФ Арæнгæрон управленийы дæлхæйттæ.
"Хъахъхъæнынады министр Гассеты Ибрагимы бардзырдмæ гæсгæ, Цхинвайлаг гарнизоны æфсад æрæвнæлдтой æфсæддон парадмæ цæттæ кæнынмæ. Дыццæгæй фæстæмæ репетицитæ уагъд цæуынц цыппæрæм гвардион базæйы плацыл", — загътой хъахъхъæнынады министрады.
Ӕнæ æфсæддон техникæйы хайадистæй парады генералон репетици уагъд æрцæудзæн 28 апрелы, æфсæддон техникæйы хайадистимæ та — 4 æмæ 6 майы.
