ЦХИНВАЛ, 17 авг — Sputnik. Сæйраг дохтырты раздæры хæстæ рæстæгмæ æххæстгæнæг Георгий Никиташенко, кæцыйы азым кæнынц "мæнг документтæй спайда кæныны" хъуыддаджы, ис гæнæн æмæ аирвæза 100 мин сомы бæрц иварæй. Уый тыххæй хъусын кæны Градус Осетии.
Никиташенкойы адвокат аздæхта тæрхонгæнджыты хъусдард, Никиташенкойыл раздæр кæй "никуы уыд æвæрд уголовон бæрндзинад, басаст йæ аххосыл æмæ æххуыс кодта фæдагуырдæн" æмæ йын фæфæлмæндæр кæной йæ тæрхон.
"Паддзахадон даугæнæг алы эпизодæн дæр домдта азымгонды фæйнæ 50 мин сомы фæивар кæнын æмæ йын снысан кæнын хатдзæгон ивар 100 мин сомы. Уыимæ иумæ, азымгонды минæвар фехъусын кодта, йæ дæлæвджид кæй фæсмон кæны æмæ куры, цæмæй йæ ныхмæ уголовон хъуыддаг æрцæуа æхгæд", — дзырдæуы хъусинаджы.
Уый фæстæ дзырды бар лæвæрд æрцыд Никиташенкойæн йæхицæн. Азымгонд загъта, кæй у разы адвокатимæ æмæ фæсмон кæны.
Никиташенко сӕйраг дохтыры хӕстӕ рӕстӕгмӕ ӕххӕстгӕнӕгӕй нысан ӕрцыд 16 январы, ацӕугӕ рӕстӕг уый сарӕзта йӕхицӕн ном коллегӕты ӕхсӕн, йӕхи сын равдыста куыд ахуыргонд ӕмӕ компетентон специалист. Фæлæ прокуророн басгæрсты фæстиуæгæн раргом æрцыд, зæгъгæ, йæ поликлиникæйы сæйраг дохтыры хæдивæгæй снысан кæныны рæстæджы, Георгий Никиташенко цы диплом æрбавдыста, уый разынд мæнг.
Февралы уый аиуварс кодтой медицинон уагдоны къухдариуæггæнæджы бынатæй.
