ЦХИНВАЛ, 20 сен — Sputnik. Президент Бибылты Анатолий райста Абхазы фыдыбӕстон хӕсты ветеранты ӕмӕ Воронежы областы делегацийы Ӕхсӕнадон проект "Взывает взорванный Цхинвал"-ы координатор Валентина Шумлянскаяйы сӕргълӕудӕй, кӕцытӕ ӕрцыдысты Хуссар Ирыстонмӕ Республикӕйы боны бӕрӕгбонмӕ.
Абхазы ветеранты делегациимӕ фембӕлды рӕстӕджы президент банысан кодта сӕ куысты нысаниуӕг дыууӕ бӕстӕйы адӕмы истори бавӕрынӕн, хъусын кӕны паддзахады сӕргълӕууӕджы пресс-службӕ.
Хӕсты ветерантӕ ӕмӕ Абхазы Очамчыры районы администрацийы номӕй делегацийы уӕнгтӕ раарфӕ кодтой Бибылты Анатолийӕн ӕмӕ Хуссар Ирыстоны адӕмӕн Республикӕйы боны цытӕн. Президент та схорзӕхджын кодта Абхазы делегацийы уӕнгты майдантӕй "Хуссар Ирыстоны Фыдыбӕстон хӕсты адӕмы уӕлахизыл 10 азы сӕххӕсты цытӕн".
Бибылты Анатолий Воронежы областы уазджыты куы райста, уӕд, сӕйраджыдӕр, загъта бузныг Валентина Шумлянскаяйӕн йӕ хъусдарды тыххӕй Хуссар Ирыстонмӕ ӕмӕ йӕ активон архайды тыххӕй алыгъуызон проектты реализацийы.
"Стыр бузныг дын дӕ куысты тыххӕй. Уымӕн нӕй гӕнӕн нӕ саргъ кӕнын. Мӕн уырны ӕмӕ иумӕйаг тыхтӕй махӕн рауайдзӕн бирӕ саразын", — загъта президент.
Шумлянская банысан кодта, зӕгъгӕ, Хуссар Ирыстоны куысты рӕстӕджы ссардта бирӕ ӕмбӕлттӕ йӕхицӕн.
Афтӕ ма президент схорзӕхджын кодта Валентина Шумлянская ӕмӕ Михаил Юковы майдантӕй "Хуссар Ирыстоны Фыдыбӕстон хӕсты адӕмы уӕлахизыл 10 азы сӕххӕсты цытӕн".
