ЦХИНВАЛ, 4 окт — Sputnik. Плиты Фатимæ. Хуссар Ирыстоны армспорты секцийы хъомылгæнинæгтæй цыппарæй стох кæндзысты дунейон ерысты Турчы, фехъусын кодта Sputnik спортсмены тренер Джиоты Валерий.
Ирыстоны спортивон кад хъахъхъæндзысты Европæ æмæ дунейон ерысты бирæ хатты уæлахиздзау Гасситы Сослан æмæ ацы æмвæзады ерысты призертæ Дыгъуызты Милена, Хæбæлаты Арсен æмæ Плиты Батрадз.
"Дунейон ерысты 90 кг уæзы фæсивæды æмæ хистæр кары спортсменты ʻхсæн æмрæстæджы тох кæндзæн Хуссар Иры æппæты тыхджындæр æмæ æнтыстджындæр æрмхæцæг Гасситы Сослан. Фæсивæды ʻхсæн дунейы чемпионаты уый ацы аз æлхынцъ кæны йæ спортивон карьерæ æмæ æнæмæнг хъуамæ райса ацы кары йæ æхсæзæм сыгъзæрин майдан. Хистæр кары спортсменты ʻхсæн та йæм æнхъæлмæ кæсæм фыццаг сыгъзæринмæ ", — радзырдта тренер Джиоты Валерий.
Тренер ма банысан кодта, иттæг хорз цæттæйæ бацыдысты ерыстæм йæ аннæ хъомылгæнинæгтæ дæр.
"Ацы аз Хуссар Ирыстоны уыд нысаниуæгджын датæ – банымады 10 азы юбилей. Фæнды нæ æвзонг республикæйæн кадæн мах дæр уæлахизтæ æрхæссæм. Плиты Батрадз, Дыгъуызты Милена æмæ Хæбæлаты Арсен тох кæнынц юниорты ʻхсæн, сты тынг хорз цæттæ. Фæстаг рæстæджы тренировкæтæ цæуынц фæтыхджындæргонд режимы æмæ хъуамæ хорз фæстиуджытæм æркæной"- бафтыдта уый.
Дунейы чемпионат æмæ фыццагад армспортæй цæудзæн туркаг Антальяйы 13-21 октябры.
