ЦХИНВАЛ, 4 фев — Sputnik, Хъуылымбегты Азӕмӕт. Хуссар Ирыстон нывӕнды сфидар кӕнын базарадон ахастытӕ бӕстӕтимӕ, кӕцытӕ хайад исынц хӕлцадон продуктты ӕхсӕнадӕмон равдысты "Продэкспо-2020". Республикӕ бавдисдзӕн сӕнтӕ, сӕ нымӕцы сӕндуцӕн "Иронсӕн"-ы продукци, ӕмӕ суадоны дон "Бӕгъиатӕ", радзырдта Sputnik вице-премьер, экономикон райрӕзты министр Бекъойты Геннадий.
"Мах фӕнды сфидар кӕнын базарадон ахастытӕ Уӕрӕсе ӕмӕ Скӕсӕны Европӕйы бӕстӕтимӕ. Фарон аз мах бафыстам документтӕ ДАР ӕмӕ ЛАР-имӕ, ныртӕккӕ кусӕм ацы республикӕтимӕ базарадон ахастытӕ райтынг кӕныныл", - радзырдта Беъкойты Геннадий.
Равдысты хайад райсдзӕн сӕндуцӕн "Иронсӕн"-ы къухдариуӕгад, хицауады минӕвӕрттӕй дзы ничи уыдзӕн, банысан кодта вице-премьер.
"Равдыст "Продэкспо" хъӕуы Хуссар Ирыстоны ӕндӕр бӕстӕтимӕ базарадон ахастытӕ сфидар кӕныны нысанӕн, продукцийы реализацийӕн", - загъта Бекъойты Геннадий.
Равдыст у иууыл авторитетон ӕрвылазон цау хӕлцад ӕмӕ нозты фадыджы. Ацы аз равдысты ӕнхъӕлмӕ кӕсынц 2,6 мин хайадисӕгмӕ 70 бӕстӕйӕ.
