ЦХИНВАЛ, 16 май – Sputnik, Плиты Фатимӕ. Хуссар Ирыстоны паддзахадон театры сценӕйыл дыццæджы ацæудзæн спектакль "Мирандолинæйы хабæртты" (Трактирщица) премьерӕ, фехъусын кодта Sputnik драмтеатры аивадон къухдариуӕггӕнӕг Дзудцаты Тамерлан.
Труппӕимæ бакуыста ӕвзонг курдиатджын режиссер, "ГИТИС"-ы рауагъдон Чумаченко Иван.
"Дыццæджы уыдзæн комедийы премьерӕ. Уый у нæ труппæ æмæ уæрӕсейаг режиссеры сфæлдыстадон тандемы куысты хатдзæг", - загъта аивадон къухдариуӕггӕнӕг.
Уӕрӕсейӕг режиссер кусы Советон цӕдисы раздӕры республикӕты ӕмӕ Уӕрӕсейы регионты. Ӕвзонг специалист, кӕцы ахуыр фӕцис ӕрмӕст 2021 азы, сæвӕрдта ныр ӕстӕм спектакль.
Пьесӕ "Трактирщица"-йы ахӕссӕн ис драматикон комедимӕ. Ныффыста йӕ италиаг фыссӕг Карло Гольдони. Архайд цӕуы уындджын сылгоймаг Мариандолинайы алыварс. Ӕрмӕг у Хуссар Ирыстоны театрӕн йӕхи ӕвзӕрст.
Уымæй раазмæ, Чумаченко Sputnik радзырдта , уый кæй у XVII ӕнусы ӕрмӕг, у иуӕй худӕг, фӕлӕ дзы ис нӕлгоймаджы трагеди дӕр. Иудзырдӕй, ӕнкъард комеди у. Сӕйраг хъайтар Мирандолинæ дӕр фӕстагмӕ йӕ лымӕнты иууылдӕр фесафдзӕн, ӕмбарын кӕны спектаклы сусӕгдзинӕдтӕ Чумаченко.