ЦХИНВАЛ, 8 авг – Sputnik. Абхазы президент Аслан Бжания загъта зӕрдӕлӕууӕн ныхӕстӕ Хуссар Иры сӕргълӕууӕг Гаглойты Аланӕн 2008 азы августы хӕсты радон афӕдзыбоны фӕдыл.
"Абхазы адӕмы ӕмӕ мӕхи номӕй зӕгъын ӕнцойы ныхӕстӕ Хуссар Ирыстоны ныхмӕ гуырдзиаг ӕфсӕддон агрессийы 14-ӕм афӕдзыбоны фӕдыл. Мӕнгард ӕмӕ ӕбуалгъ фыдракӕнд саразгӕйӕ, Гуырдзыстон радон хатт равдыста ӕппӕт ӕхсӕнадӕмон ӕмӕхсӕнадӕн йӕ ӕцӕг цӕсгом ӕмӕ фӕндтӕ", - дзырдӕуы телы.
Бжания банысан кодта, Хуссар Иры хъӕбатыр ӕмӕ фӕразон адӕм кӕй фӕлӕууыдысты Гуырдзыйы ӕфсӕрсты ныхмӕ, баиргъӕф кодтой сӕ сӕрибардзинад ӕмӕ хӕдбардзинад. Афтӕ ма уый загъта бузныг Уӕрӕсейӕн дӕр, кӕцы бахъахъхъӕдта хуссарирыстойнаг адӕмы, сабырады ӕмӕ рӕстдзинады.
Ӕфсымӕрон республикӕйы сӕргълӕууӕг бафтыдта, Абхазы адӕм дӕр кӕй бавзӕрстой хиуӕттӕ ӕмӕ ӕмгӕртты зиӕнтты рис ӕмӕ абон хъынцъым кӕны ирон адӕмимӕ иумӕ.
Хуссарирыстойнаг минӕварады Абхазы дӕр ацыд мысӕн мадзал 2008 азы хӕсты амӕттӕгты номыл.
Гуырдзыстойнаг ӕфсад райдыдта ӕххӕстмасштабон ӕрбабырст 2008 азы 8 августы æмбисæхсæвмæ æввахс. Цхинвалы æмæ горæты алыварс хъӕуты Гуырдзыстоны ӕфсад фӕкодта карз ӕхсты бын.
Уый фæстæ Цхинвалмæ бабырстой танктæ æмæ гуырдзиаг тыхон структурæты равзаргæ хæйттæ. Республикӕйы столицӕйӕн ӕрхастӕуыд стыр зиан, фылдӕр кодта сабыр цӕрджыты ӕмӕ фидауынгӕнӕг тыхты ӕхсӕн амӕттӕгты нымӕц — фӕмард 380 адӕймагӕй фылдӕр.
Ацы трагикон уавӕры уӕрӕсейаг къухдариуӕгад аскъуыддзаг кодта тугкалд ӕрлӕууын кӕнын ӕмӕ Гуырдзыстоны тыхӕй сабырадмӕ ӕркӕныны операци райдайын. Уый кӕронмӕ бахӕццӕ 12 августы.
Гуырдзыстон абоны онг дӕр нӕ банымадта райхалгӕ хӕст ӕмӕ ирон радон геноциды фӕдыл йӕ бӕрн.