Хуссар Иры фыццаг хатт ивар кӕнынц фистӕг бӕлццӕтты ФЗУ халыны тыххӕй

© Sputnik / Алексей Ковалев1 сентября 2016 Цхинвал школьники
1 сентября 2016 Цхинвал школьники - Sputnik Хуссар Ирыстон
Рафыссын
Паддзахадон автоинспекцийы инспектортӕ уадзынц сӕйрагон рейдон мадзӕлттӕ ӕрмӕст тӕссаг шофырты рафӕлгъауынӕн нӕ, фӕлӕ ма æнæрхъуыды фистӕг бӕлццӕттыл бӕрндзинад сӕвӕрынӕн дӕр.

ЦХИНВАЛ, 18 окт — Sputnik, Козаты Дианӕ. Хуссар Ирыстоны Паддзахадон автоинспекцийы управлени фыццаг хатт райдыдта ивар кӕнын фистӕг бӕлццӕтты фӕндагон змӕлды уагӕвӕрд халыны тыххӕй. ПАИ-йы управленийы сӕргълӕууӕг Цхуырбаты Эльбрус радзырдта Sputnik, сӕрмагонд рейдон мадзӕлтты рӕстӕджы цалдӕр ӕмбӕстагыл ӕвӕрд кӕй ӕрцыд административон бӕрндзинад.

МХМ-ы ӕрвылкъуырион æмбырдуацтӕй бӕрӕг у, ӕрмӕст ивгъуыд къуырийы мидӕг Цхинвалы кӕй ӕрцыд регистраци ӕртӕ фӕндагон-транспортон цауы фистӕг бӕлцӕттӕ ӕмӕ машинӕты хайадистӕй, уыдонӕй дыууӕ уыдысты сывӕллӕттӕ, иу та 86-аздзыд нӕлгоймаг.

Въезд в Цхинвал - Sputnik Хуссар Ирыстон
Фыццаг "амонды фыстӕджытӕ" шофыртӕн

Амондӕн, ацы цаутӕ ахицӕн сты ӕнӕ зиӕнттӕй. ПАИ-йы управленийы сӕргълӕууӕджы ныхӕстӕм гӕсгӕ, алыхатт ФТЦ-ты аххосджын ӕрмӕст шофыртӕ нӕ вӕййынц, арӕх бӕлцӕттӕ сӕхӕдӕг аразынц тӕссаг уавӕртӕ фӕндӕгтыл.

"Мах ауагътам рейдон мадзӕлттӕ сӕрмагондӕй фистӕг бӕлцӕтты тыххӕй. Кусджыты хъусдард здӕхт уыд бӕлцӕтты аххосӕй ФТЦ-ы профилактикӕмӕ. Цыбыр ӕмгъуыдмӕ инспектортӕ дӕс хатты срегистраци кодтой Фӕндагон змӕлды уагӕвӕрд фехалыны цаутӕ бӕлцӕтты ӕрдыгӕй", — загъта уый.

Фистӕг бӕлццӕттӕй кӕцыдӕртӕ се ‘нӕхъуыдыдзинады тыххӕй бафыстой 500 сомы онг, ахӕм хабар та Хуссар Ирыстоны ныры онг никуыма уыд.

Тындзгӕ бӕлцӕтты цардӕн фӕндагыл хизгӕйӕ вӕййы тас. Фӕлтӕрд инспектортӕ ӕмӕ шофыртӕ дисы бафтынц, фӕндагон змӕлды фистӕг хайадисджытӕ цы маневртӕ саразынц, уыдонӕй.

"20 азӕй фылдӕр мын ис шофыры стаж, фӕлӕ арӕх фӕндагыл ахӕм диссӕгтӕ фенын бӕлццӕтты хайадистӕй ӕмӕ мӕ нӕ фӕуырны, удӕгасӕй кӕй аирвӕзынц. Иутӕ дзы бынтондӕр фӕйнӕрдӕм нӕ кӕсынц, ӕмӕ уыдон ӕрмӕст сывӕллӕттӕ нӕ вӕййынц, фӕлӕ хистӕр кары адӕм дӕр. Афтӕмӕй та стӕй трагедийы аххосджын разыны шофыр, кӕцы рӕстӕгыл нӕ сырӕхсы машинӕ фӕуромын", — дзуры Цхинвалы цӕрӕг Плиты Вадим.

Цхуырбаты Эльбрус ма банысан кодта, рейдон мадзӕлттӕй дарддӕр ма ӕнӕрлӕугӕйӕ кӕй цӕуы профилактикон куыст фӕндӕгтыл ӕдасдзинад фӕбӕрзонддӕр кӕныны нысанӕн. Уагъд цӕуынц сӕрмагонд уроктӕ ахуыргӕнинӕгтӕн.

"Хъыгагӕн, ацы уроктӕ рӕстӕгмӕ уагъд нал цӕуынц кадрты проблемӕйы тыххӕй, фӕлӕ сӕ тагъд рӕстӕджы фӕстӕмӕ сӕндидзын кӕндзыстӕм", — ныфс радта ПАИ-йы сӕргълӕууӕг.

Скъæрæн бартæ дæтдзысты æрмæстдæр автоскъолайы ахуыр рацæуыны фæстæ

Йӕ ныхӕстӕм гӕсгӕ, уый иу ӕмӕ дыууӕ хатты нӕ уыд ӕвдисӕн фистӕг бӕлццӕтты ӕнӕрхъуыдыдзинадӕн. Фӕлӕ алыхатт трагедийы ӕрмӕст уыдон нӕ вӕййынц аххосджын — уымӕн йӕ аххосӕг вӕййынц бирӕ фактортӕ, уый нымӕцы расыг шофыртӕ, кӕцытӕ Хуссар Иры стӕм не ′сты, исгӕ мадзӕлттӕм ӕнӕкӕсгӕйӕ.

"Уымӕй дарддӕр ма бирӕ рӕтты хӕрзарӕзт не ′сты фистæгон ахизæнтӕ. Мах ӕрӕджы бахатыдыстӕм президентмӕ куырдиатимӕ, цӕмӕй уый ӕмбӕлон службӕты хъусдард аздаха ацы проблемӕмӕ. Кӕмдӕрты сты ӕвӕрд амонӕгтӕ, фӕлӕ нӕй фӕндагон хӕххытӕ. Науӕд та йӕ ахорӕн баихсыд ӕмӕ нал ӕрцыд ранӕуӕггонд. Кӕцыдӕр уынгты нал зыны дихгӕнӕг хахх, цӕй фӕстиуӕгӕн ӕрцӕуынц арӕхгонд ФТЦ-тӕ", — банысан кодта Цхуырбаты Эльбрус.

Дыууӕ хаттӕй фылдӕр цы алвӕндӕгтыл ӕрцыд аваритӕ, уым ПАИ-йы рекомендацимӕ гӕсгӕ сӕвӕрын хъӕуы светофор, науӕд та "хуысгӕ полицӕйагтӕ".

Фӕстӕгтӕ горӕты нӕ уадзынц ӕвӕрын, фӕлӕ, гӕнӕн уӕвгӕйӕ, Цхинвалы рӕстӕджы цыдимӕ фӕфылдӕр уыдзӕн светофорты нымӕц.

Ног хабӕртты лентӕ
0