ЦХИНВАЛ, 11 ноя — Sputnik, Болататы Алина. Дзӕуджыхъӕуы ӕрбайгом Дӕсӕм ӕхсӕнадӕмон аивадон симпозиум "Аланика. Юбилей куыд шанс". Ацы цытджын боны цытӕн мадзалы организатортӕ ӕмӕ хайадисджытӕн раарфӕ кодта РЦИ-Аланийы хицауады сӕрдар Тъускаты Таймураз.
"Кӕй зӕгъын ӕй хъӕуы, культурӕ ӕмӕ экономикӕйы ӕхсӕн ис бастдзинад. Ахӕм бӕрзонд ӕмвӕзадыл культурон мадзӕлттӕ уадзын йӕ бон цы регионӕн у, уымӕн йӕ бон у экономикон хӕслӕвӕрдтӕ скъуыддзаг кӕнын дӕр. Ӕмӕ ахӕм форумты ауагъд бӕлвырд кӕны республикӕйы размӕцыд ӕмӕ амбицитӕ. Уымӕ гӕсгӕ, мӕ цӕст уарзы, цӕмӕй ахӕм мадзӕлтты нымӕц уа фылдӕр", — загъта Тъускаты Таймураз.
Симпозиумы сӕйраг хӕслӕвӕрдтӕй иу у — нырыккон аивадмӕ алыварсон публикӕйы хъусдард аздахын. Алиса Прудниковайы ныхӕстӕм гӕсгӕ, тынг ахсджиаг у, цӕмӕй йын бынӕттон цӕрджытӕ дӕр саргъ кӕной.
"Аланика"-йы фӕрцы регионы фӕзынд нырыккон аивады хъӕздыг коллекци. Уыдон сты раздӕры симпозиумты фӕстиуджытӕ ӕмӕ ныр уыцы куыстытӕ сты НАПЦ-ы филиалы коллекцийы. Зӕгъӕн ис, ӕмӕ уый у цӕттӕ музей. Дзӕуджыхъӕуы зындзинад ис уый мидӕг ӕмӕ нырыккон аивадӕн тыгъдад кӕй нӕй. Куыстытӕн иууылдӕр иумӕйаг ӕххӕст тагъдадмӕ рахӕссӕн куы уаид, уӕд Цӕгат Ирыстон суаид бӕстӕйы нырыккон аивады сӕйраг центртӕй иу", — радзырдта Прудникова.
Национ зонадон библиотекӕйы равдысты ӕвӕрд уыдысты фестивалы хайадисджыты иууыл ирддӕр куыстытӕ ӕмӕ инсталляцитӕ. "Аланика" ивы ӕрмӕст кӕсджыты нырыккон аивады ӕмбудӕн нӕ, фӕлӕ ма нывгӕнджыты сӕхи дӕр. Ӕртӕ симпозиумы хайадисӕг, къамисӕг Тедеты Хъазбег радзырдта, форум фадат кӕй дӕтты ӕрмӕст ӕнкъарӕнтӕ ӕмӕхъуыдытӕ равдисынӕн нӕ, фӕлӕ ма дӕтты бирӕ зонындзинӕдтӕ.
Юбилейон равдысттӕ айтынг сты цалдӕр фӕзуатыл. Горӕт Беслӕны культурӕйы хӕдзары ӕвдыст ӕрцӕудзысты 2004 азы трагикон цаутӕн нывонд куыстытӕ; Дзӕуджыхъӕуы музейон экспозицимӕ баххӕст уыдзысты горӕттаг локалон контекстимӕ куыстытӕ.
Ноджы ма дыууӕ уӕрӕх экспозици айтынг уыдзысты РЦИ-Аланийы Националон зонадон библиотекӕйы равдыстон залты ӕмӕ республикӕ Цӕгат Ирыстон — Аланийы Нывгӕнджыты Цӕдисы равдыстон залы.
Ӕхсӕнадӕмон аивадон симпозиум "Аланика" уагъд цӕуы ӕрвылаздӕр дӕс адзы фӕд-фӕдыл. 2007 азӕй фӕстӕмӕ уый ӕрбангом кодта Уӕрӕсейы актуалон аивады минӕвӕртты Калининградӕй Уралы онг ӕмӕ нывгӕнджыты 22 бӕстӕйӕ — Стыр Британи, Швеци, Франц, Германи, Австри, Итали, Испани, Венгри, Гуырдзыстон, Польшӕ, Бельги, Израиль, Белорусси, Инди, Иран, Турк, Египет ӕмӕ Эквадорӕй.
Мадзалы организатортӕ ацы аз сты нырыккон аивады Паддзахадон центры Цӕгат-Кавказаг филиал ӕмӕ ӕнӕкоммерцион фонд "Аланика" (Дзӕуджыхъӕу), УФ культурӕйы министрады ӕххуысӕй.
